Հաջողության հասնելու համար Հայաստանը պիտի ավելի մեծ ուշադրություն դարձնի կրթությանը. Նոբելյան մրցանակակիր (ֆոտո)

Հայաստանն ու Իսրայելը ընդհանուր շատ բան ունեն. երկու երկիրն էլ փոքր են, երկուսն էլ շրջապատված են, սակայն Իսրայելն ավելի մեծ ուշադրություն է հատկացնում կրթությանը, իսկ Հայաստանն այդ առումով հետ է մնում: Նման կարծիք է հայտնել քիմիայից Նոբելյան մրցանակակիր Աարոն Չեխանովերը, որը Երեւան է եկել   4 այլ մրցանակակրի հետ` մասնակցելու «Հայաստանում Նոբելյան օրերին»:

«Մեր երկրներն ընդհանուր շատ բան ունեն. երկու երկիրն էլ շրջապատված են, երկուսն էլ փոքր են, երկուսի բնակիչներն է ստիպված են հույսը դնել սեփական խելքի վրա: Դուք բնական պաշարներ չունենք, մինչեւ վերջերս մենք էլ չունեինք, բայց այժմ մենք գազ ունենք: Սակայն մեզ մոտ ավելի մեծ ուշադրություն են հատկացնում  կրթությանը, իսկ Հայաստանն այս առումով մի քիչ հետ է մնում», - ասել է նա:

Նրա կարծիքով, Հայաստանի կառավարությունը պիտի ավելի շատ աջակցի կրթությանը եւ երկրում գիտության զարգացմանը, ինչպես նաեւ իր քաղաքացիներին, չէ որ նրանց մեջ իրոք խելացիները եւ տաղանդավորները կան:  Սփյուռքի փորձը ցույց է տալիս, որ հայերն իրոք կարող են շատ հաջողակ լինել, նրանք ունեն դրա համար անհրաժեշտ ամեն ինչ, սակայն ինչ-որ բանի հասնելու համար նրանց հնարավորություններ են անհրաժեշտ եւ կառավարության աջակցությունը:  

Սա Աարոն Չեխանովերի առաջին այցը չէ: Նա այստեղ է եղել նաեւ  2010-ին, եւ այդ ժամանակվանից, նրա խոսքով, Հայաստանում շատ բան է փոխվել դեպի լավը, սակայն կան շատ բաներ, որ հնարավոր է փոխել: 

«Ես հույս ունեմ, որ մեր երկրներն ապագայում կկարողանան համագործակցել մեկ նպատակով` մարդկային կյանքն ավելի լավը դարձնելու», - ասել է մրցանակակիրը: 

Հիշեցնենք, որ Աարոն Չեխանովերը Երեւան է եկել` մասնակցելու Հայաստանում Նոբելյան օրերին Նոբելյան այլ մրցանակակիրների հետ` Ադա Յոնատի  (Իսրայել), Դան Շեխտմանի (Իսրայել), Ջոն Ռոբին Ուորենի (Ավստրալիա) եւ Էյ-Իթի Նեգիսիի  (Ճապոնիա):

Հիշեցնենք նաեւ, որ առաջին անգամ «Նոբելյան օրեր» միջոցառման շրջանակում ընթացիկ տարվա ապրիլի 12-ից 16-ին Երեւանի Մ. Հերացու անվան բժշկական համալսարանը հյուրընկալում է Նոբելյան 5 մրցանակակրի, որոնք դասախոսություններով հանդես կգան կենսաքիմիայի, ֆիզիկայի եւ բժշկության, ինչպես նաեւ աշխարհում գիտության գլոբալ խնդիրների վերաբերյալ:

Հետևեք NEWS.am Medicine-ին Facebook-ում և Twitter-ում