Հայաստանում դադարեցվել է «Բիոպարոքս» դեղի շրջանառությունը

Հիմք ընդունելով «Լես Լաբորատոիրես Սերվիե» դեղագործական ընկերության գրությունը, Ակադեմիկոս Էմիլ Գաբրիելյանի անվան դեղերի  եւ բժշկական տեխնոլոգիաների փորձագիտական կենտրոն» ՓԲԸ-ի 2016 թվականի ապրիլի 21-ի թիվ 0101069616 եզրակացությունը` ՀՀ առողջապահության նախարարի 2016 թվականի ապրիլի 22-ի թիվ 1213-Ա հրամանով դադարեցվել  եւ անվավեր է ճանաչվել «Բիոպարոքս, (ֆուզաֆունգին)» դեղի բոլոր խմբաքանակների  շրջանառությունը:

Նախարարի հանձնարարականով` տվյալ դեղը ներմուծող դեղագործական կազմակերպությունները պետք է հանրապետության տարածքում գործող դեղատներից եւ բժշկական կազմակերպություններից հետ հավաքեն առկա բոլոր խմբաքանակները:

Նշենք, որ Դեղերի եւ բժշկական տեխնոլոգիաների փորձագիտական կենտրոնի կայքում տեղադրված է Les Laboratories Servier-ի երեւանյան գրասենյակի նամակը, որում ասված է, որ դեղամիջոցի կիրառությունից հետո գերզգայունության հակազդեցությունների վերաբերյալ մեծ քանակությամբ հաղորդագրությունների պատճառով Դեղամիջոցների եվրոպական գործակալությունը ստուգում է սկսել այդ դեղի արդյունավետության եւ անվտանգության վերաբերյալ:   

Արդյունքում պարզվել է, որ դեղամիջոցի կիրառության օգուտը չի գերազանցում դրա հետ կապված ռիսկերը, այդ պատճառով ԵՄ-ում որոշում է կայացվել եվրոպական շուկայից հետ կանչել դեղամիջոցը: Դրանից հետո արտադրողը որոշում է կայացրել դադարեցնել ամբողջ աշխարհում «Բիոպարոքս» դեղամիջոցի վաճառքը:

Ռոսպրոմնադզորը եւս նախօրեին որոշում է կայացրել Ռուսաստանի տարածքում դեղամիջոցն արգելելու մասին:

Բիոպարոքս սփրեյն օգտագործվում է որպես տեղային հակաբորբոքային եւ հակամանրէական դեղամիջոց վերին շնչուղիների վարակիչ հիվանդությունների բուժման համար, ինչպիսիք են ռինիտը, սինուսիտը, տոնզիլիտը, ռինոֆարինգիտը եւ այլն: 

Հետևեք NEWS.am Medicine-ին Facebook-ում և Twitter-ում