Փաթեթների, պարկուճների մեջ պահվող կամ հաբերի տեսքով լվացող միջոցները փոքր երեխաների համար ամենավտանգավոր միջոցն են: Նման եզրակացության են հանգել ամերիկացի գիտնականները:
Հետազոտողները վերլուծել են երկու տարվա ընթացքում Վիրջինիայի նահանգի թունաբանական կենտրոնների ստացած հեռախոսազանգերը: Այդ ընթացքում մոտ 62 300 զանգ է ստացվել, որոնք կապված էին 6 տարեկանից փոքր երեխաների վրա մաքրող միջոցի ազդեցության հետ: Ընդ որում, դրանց ավելի քան 60 տոկոսը կազմում էին այն դեպքերը, երբ այն հաբի կամ պարկուճի տեսքով էր:
Վերջին տարիներին կենցաղային քիմիայի նման ձեւը գնալով ավելի մեծ ժողովրդականություն է ձեռք բերում. Տնտեսուհիներն ավելի քիչ ժամանակ են ծախսում լվացքի համար անհրաժեշտ քանակությունը չափելու համար:
Սակայն ամենածանր կլինիկական հետեւանքները (կոմա, շնչառության, սրտի հետ կապված խնդիրներ, ներքին այրվածքներ եւ այտուցումներ, մահացու ելք) գիտնականները գրանցել են հենց այն ժամանակ, երբ երեխաները թունավորվել են լվացման գունավոր պարկուճներով, հայտնում է The Daily Mail-ը:
Մայրիկների կողմից սովորական լվացքի փոշու օգտագործման դեպքում նման լուրջ հետեւանքների հավանականությունը անհամեմատ ավելի ցածր է, նշում են գիտնականները:
«Շատ ընտանիքներ չեն հասկանում, թե որքան թունավոր կարող են լինել լվացքի համար բարձր խտությամբ գելերը, որոնք փաթեթավորված են պարկուճների մեջ, - ասում են հետազոտության հեղինակները: Այդ պատճառով չարժե ռիսկի դիմել: Եթե դուք փոքր երեխաներ ունեք, ավելի լավ է ավանդական լվացող միջոց օգտագործել»:
Երկու տարվա ընթացքում պարկուճների կամ հաբերի հետ կապված կանչերի թիվն աճել է 17 տոկոսով: Երեխաները հաճախ լվացող միջոցով փաթեթները ուտելի բանի տեղ են դնում վառ գույնի եւ սննդային փաթեթավորմանը նմանության պատճառով:
Գիտնականները զգուշացնում են. եթե տնտեսուհին լվացքի համար գելային պարկուճներ է օգտագործում, դրանք պիտի պահվեն փակ պահարանում կամ էլ բարձր դարակին, երեխայի աչքերից հեռու:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր