Անկանոն սնվելը մեծացնում է հիպերտոնիայի, դիաբետի եւ ճարպակալման զարգացման ռիսկը

«Ես այն եմ, ինչ ուտում եմ», - ասում են շատերը` լիովին մոռանալով, որ կարեւոր է ոչ միայն այն, ինչ մենք ուտում ենք, այլեւ այն, թե ինչպես ենք ուտում դա: Անկանոն սնվելը եւ սննդի ընդունումները բաց թողնելը բարձրացնում է հիպերտոնիայի, ճարպակալման եւ շաքարային դիաբետի զարգացման ռիսկը, պնդում են Proceedings of the Nutrition Society ամսագրում հրապարակված հետազոտությունների հեղինակները:

Այսօր աշխատող ժամանակակից մարդիկ գնալով ավելի հաճախ են բաց թողնում սննդի ընդունումը եւ փողոցում անառողջ սնունդ են ընդունում` հենց ընթացքի մեջ եւ շատ արագ: Սննդի ընդունման ժամանակի կանոնավոր խախտումներն ազդում են մարդու ներքին ցիրկադային  ռիթմերի վրա, որոնք 24-ժամյա շրջափուլի են ենթարկվում: Այդ ռիթմերի հետ են համաձանեցվում նյութափոխանակային շատ գործընթացներ, ներառյալ ախորժակը, մարսողությունը եւ ճարպերի, խոլեստերինի եւ գլյուկոզայի ճեղքումը: 

Լոնդոնի թագավորական քոլեջի եւ Նյուկասլի համալսարանի գիտնականները  (Մեծ Բրիտանիա) այն եզրակացությանն են հանգել, որ անկանոն սննդի պայմաններում էականորեն մեծանում է նյութափոխանակային եւ սրտանյութափոխանակային համախտանիշի զարգացման ռիսկը. դրանք վտանգավոր վիճակներ են, որոնք պայմանավորված են օրգանիզմի նյութափոխանակային եւ անոթային գործառույթներում խախտումների ամբողջ համալիրով: 

«Անկանոն սնունդը օրգանիզմի բնական օրական կենսառիթմերի խախտման է հանգեցնում, որոնց «կապված» են նյութերի փոխանակության կարեւորագույն գործընթացներ` քաղցի զգացումը, մարսողությունը, ճարպերի, խոլեստերինի եւ գլյուկոզայի ճեղքումը: Այդ դեպքում հատկապես տուժում են լյարդը եւ աղիները», - հոդվածում հայտնել են հետազոտողները: 

Մասնագետներն ուսումնասիրել են, թե նյութափոխանակության վրա ինչպես է ազդում այսպես կոչված խրոնոսնունդը` համակարգ, որի դեպքում մարդը կանոնավորապես սնվում է իր ներքին անհատական կենսառիթմերին համապատասխան: Պարզվել է, որ առողջության համար շատ վտանգավոր է ապրել ոչ թե բնական կենսաբանական, այլ սոցիալական ժամացույցին համապատասխան, որը թելադրված է աշխատանքով եւ զբաղվածությամբ: 

Գիտնականների խոսքով, մարդկանց սննդի մեջ սուր խնդիր է մնում կալորիաների բաշխման հարցը. օրվա ընթացքում դրանց անկանոն եւ «քաոսային» մուտքն օրգանիզմ պաթոլոգիական գործընթացների է հանգեցնում:  

«Մենք հեռու ենք այն ընկալումից, թե պետք է արդյոք, որ կալորիաների ստացումը հավասարապես  բաշխված լինի օրվա ընթացքում, թե ամենակալորիականը պետք է լինի նախաճաշը, կամ ճաշը, կամ ընթրիքը», — նշել է հետազոտության հեղինակներից մեկը` Հերդա Պոտը: 

Ընդհանուր առմամբ հետազոտողները կարծում են, որ օրգանիզմի համար ամենաօգտակարը երեք անգամյա սնունդն է, ընդ որում ցանկալի է` ընտանիքի եւ ընկերների շրջապատում: Նրանց կարծիքով`   «հաճախ եւ մի քիչ ուտելու» սկզբունքը, ընդհակառակը, նպաստում է քաշ հավաքելուն, եթե խստորեն չվերահսկվի սննդի կալորիականությունը:

Հետևեք NEWS.am Medicine-ին Facebook-ում և Twitter-ում