«Ուղեղի համար հաբերը» բացասաբար են ազդում ինտելեկտի վրա

Այսպես կոչված «ուղեղի համար հաբերը», որոնք իբր լավացնում են մտավոր ունակությունը եւ հիշողությունը, իրականում բացասաբար են ազդում մարդու ինտելեկտի վրա, նախազգուշացնում են Օքսֆորդի համալսարանի հետազոտողները:

Ուղեղի աշխատանքն ուժեղացնող դեղերն աշխարհում ավելի ու ավելի տարածված են դառնում. որոշ երիտասարդներ հուսով են, որ այդ հաբերի օգնությամբ ավելի լավ կսովորեն, քննությունները հեշտ կհանձնեն եւ ավելի արագ կյուրացնեն տեղեկատվությունը: Սակայն բրիտանացի գիտնականները պարզել են, որ այդ դեղամիջոցների որոշ տարատեսակներ ոչ միայն չեն լավացնում ուղեղի աշխատանքը, այլ, հակառակը, կարող են թուլացնել հիշողությունը:

Այդ դեղամիջոցներից ամենատարածվածներից մեկը ռիտալինն է, որը դասվում է հոգեխթանիչների շարքին: Սովորաբար այն նշանակում են ուշադրության պակասի ախտանիշով տառապող հիպերակտիվությամբ մարդկանց: Հնարավոր է, այսպիսի խանգարմամբ մարդկանց այն իրոք օգնում է, սակայն խնդիրն այն է, որ զարգացած մտավոր ընդունակություններով մարդկանց մոտ այս դեղամիջոցը կարող է հակառակ էֆեկտ առաջացնել՝ վատացնել նրանց մտավոր ունակությունները

Մեկ այլ տարածված դեղ կարելի է համարել մոդաֆինիլը, որը կիրառում են քնի խանգարումների դեմ պայքարի համար, ինչպիսին է թմրալեպսիան: Դեղի ազդեցությունը ուղեղի վրա դեռ ամբողջությամբ չի ուսումնասիրվել, բայց հայտնի է, որ դեղամիջոցը գործում է դոֆամինի մակարդակի բարձրացման հաշվին: Մոդաֆինիլի օգտագործումը լավացնում է ուշադրությունը, բայց մինչ այժմ հայտնի չէ, տալի՞ս է այն մտավոր որեւէ լրացուցիչ առավելություն: Դրա փոխարեն, գիտնականները կասկածում են, որ մոդաֆինիլը կարող է  ձեզ պակաս խելացի դարձնել՝ նվազեցնելով մտածողության կրեատիվությունն ու ճկունությունը:

Երկու դեղամիջոցն էլ կարող են ինչ-որ իմաստով օգնել  ոչ ինտելեկտուալներին, սակայն ի բնե խելացի մարդկանց  այն ոչ մի լավ բան տալ չի կարող:

Հետևեք NEWS.am Medicine-ին Facebook-ում և Twitter-ում