4 բիոմարկերներ ցույց են տալիս կաթվածի հավանականությունը

Կանադացի գիտնականները հայտնաբերել են 4 բիոմարկերներ, որոնց բարձր պարունակությունն արյան մեջ կարող է վկայել ինսուլտի առաջացման վտանգի մեծության մասին: Կաթվածի առաջացման վտանգը 25-33 տոկոսով բարձր է եղել այն հիվանդների մոտ, որոնց արյան անալիզի արդյունքում հայտնաբերվել են այս բիոմարկերներից մեկի բարձր ցուցանիշներ:

Հետազոտության շրջանակում գիտնականները չափել են 3224 մասնակիցների արյան մեջ 15 բիոմարկերների մակարդակը: Մասնակիցների միջին տարիքը 61 տարեկանն էր, եւ նրանցից ոչ մեկը նախկինում կաթված չէր տարել: Աշխատանքի ինը տարիների ընթացքում կաթված է ստացել մասնակիցներից 98-ը: Պարզվել է, որ 15 բիոմարկերներից կաթվածի հետ զուգորդվում են 4-ը: Անոթների էնդոթելիումի աճի գործոնի բարձր մակարդակը նշանակել է կաթվածի հավանականության 25 տոկոսով մեծացում, C-ռեակտիվ սպիտակուցի դեպքում՝ 28 տոկոսով, իսկ արյան մեջ հոմոցիստենինի եւ ուռուցքի մեռուկների գործոնի 2 ռեցեպտորների քանակի մեծացումը հանգեցնում էին սպասվող կաթվածի վտանգի համապատասխանաբար 32 եւ 33 տոկոսով մեծացման: Այս 4 բիոմարկերների հավելումը վտանգի ստանդարտ գործոններին (տարիք, սեռ, խոլեստերինի մակարդակ, արյան ճնշում) հնարավորություն է տվել առավել ճշգրիտ կանխատեսել, թե հիվանդներից ով կաթվածով ախտահարվելու ամենամեծ հավանականություն ունի:

Ինչպես նշել է հետազոտության հեղինակներից McMaster University-ի գիտնական Աշքան Շոամանեշը, ռիսկի խմբում ընդգրկված մարդկանց նույնականացումը կօգնի որոշել, թե ում ավելի մեծ օգուտ կտան բուժման նոր կամ արդեն ստուգված մեթոդները:

Շոամանեշը նաեւ ընդգծել է, որ նշված բիոմարկերները միայն կաթվածի հետ զուգորդված են, բայց այն չեն հրահրում: Բացի այդ, չափումները մեկ անգամ են կատարվել, իսկ հետազոտության մեջ հաշվի չեն առնվել հնարավոր ինֆեկցիաները, քրոնիկական հիվանդությունները եւ այլ վիճակներ, որոնք կարող էին ազդել արդյունքների վրա:

Հարկ է նաեւ նշել, որ մասնակիցները հիմնականում եվրոպացիներ են եղել, եւ եզրակացությունները կարող են չտարածվել այլ ռասաների ներկայացուցիչների վրա:

Հետևեք NEWS.am Medicine-ին Facebook-ում և Twitter-ում