Ֆիթնես թրեքերը կհաշվարկի սպորտի անհրաժեշտ քանակությունը վաղաժամ մահվան վտանգի նվազեցման համար

Գիտնականները նոր ֆիթնես թրեքեր են մշակել, որը կհաշվարկի սպորտի անհրաժեշտ քանակությունը եւ իր տիրոջը կօգնի նվազեցնել սրտանոթային հիվանդություններից վաղաժամ մահվան ռիսկը:  Այդ մշակումը ներկայացվել է Սրտաբանական ընկերակցության եվրոպական կոնգրեսին (European Society of Cardiology):

Մարդու սրտային ռիթմի մասին տեղեկություններ օգտագործելով` թրեքերը հաշվարկում է ֆիզիկական ակտիվության անհրաժեշտ քանակությունը, որը, ինչպես բազմիցս հաստատել են հետազոտությունները, նվազեցնում է սրտի հիվանդությունների զարգացման ռիսկը:  Ալգորիթմը, որի հիմքի վրա աշխատում է թրեքերը, ստեղծվել է 4637 մարդու մասնակցությամբ ֆիթնես հարցման արդյունքում:  Վարժությունների հաճախության, ինտենսիվության եւ շարունակականության, ինչպես նաեւ վաղաժամ մահվան եւ սրտանոթային հիվանդությունների առաջացման վրա դրանց ազդեցության մասին տվյալները հիմք են հանդիսացել հաշվարկման պարզ համակարգի` Personal Activity Intelligence-ի` PAI մշակման համար:

Յուրաքանչյուր վարժության համար թրեքերի տերը PAI-ի որոշակի քանակությամբ միավորներ է ստանում: Մշակողների խոսքով, չափազանց ցածր ֆիզիկական ակտիվության հետ կապված տհաճ հետեւանքներից խուսափելու համար պետք է ընդամենը PAI-ի թիվը 100-ից բարձր պահել:

Մշակումից հետո ալգորիթմը լրացուցիչ ստուգվել է գրեթե 40 000 մարդու վրա եւ հաստատել իր աշխատունակությունը: Գիտնականները պարզել են, որ այն մարդկանց մոտ, որոնք թույլ չեն տվել, որ PAI-ի ցուցիչը 100-ից ներքեւ իջնի, սրտանոթային հիվանդություններից վաղաժամ մահվան հավանականությունը 15 տոկոսով ավելի փոքր է եղել, քան ոչ ակտիվ խմբի մոտ: Որքան ավելի շատ է մարզվել մարդը, այնքան մեծ է եղել PAI-ի թիվը եւ այնքան փոքր են եղել ժամանակից շուտ հիվանդանալու եւ մեռնելու ռիսկերը:  

Հետազոտության առաջատար հեղինակ Յավեյդ Նեումանը Norwegian University of Science and Technology-ից պատմել է, որ PAI-ի հաշվարկման համակարգը պարզ է եւ այժմեական բոլորի համար, անկախ տարիքից եւ ֆիզիկական վիճակից: Նա հավելել է, որ եթե մարդը սպորտով է զբաղվում բարձր ինտենսիվությամբ, միավորներն ավելի արագ են հավաքվում, սակայն երկարատեւ եւ պակաս ինտենսիվ ծանրաբեռնվածությունը եւս օգտակար է:

Հետևեք NEWS.am Medicine-ին Facebook-ում և Twitter-ում