2016 թվականի առաջին 9 ամսվա ընթացքում Սրտի անհետաձգելի վիրահատության «Stent for life» ծրագրի շրջանակում պսակաձեւ զարկերակների ստենտավորման 1317 վիրահատություն է կատարվել: Այդ բոլոր վիրահատություններն արվել են պետպատվերի շրջանակում: Այդ մասին լրագրողներին հայտնել է Առողջապահության նախարարության աշխատակազմի բուժօգնության քաղաքականության վարչության պետ Ծաղիկ Վարդանյանը:
Նրա խոսքով, անցյալ տարվա առաջին 9 ամսվա ընթացքում 737 ստենտավորում են արել, գրեթե 2 անգամ պակաս, իսկ ամբողջ 2015 թվականի ընթացքում` 1516:
Իսկ ընդհանուր առմամբ Հայաստանում («Stent for life» ծրագրից դուրս), Ծաղիկ Վարդանյանի ներկայացրած տվյալների համաձայն, տարեկան մոտ 11 000 սրտի եւ անոթների վիրահատություն է կատարվում, որոնցից մոտ 5000-6000 հազարը` ստենտավորում: Ամեն տարի նաեւ 18 տարին չլրացած անչափահասների 150-300 վիրահատություն է կատարվում:
Հիշեցնենք, որ «Stent for life» ծրագիրը Հայաստանում գործում է 2015 թվականի հունվարից: Ծրագրի շրջանակում ծրագրի չափանիշներին համապատասխանող բոլոր հիվանդները (հիվանդը պետք է սրտամկանի կաթված տարած լինի ST էլեւացիայով (սրտի սուր կաթվածի ամենածանր տեսակը, որը հայտնի է որպես լայնածավալ կաթված), կկարողանան պետպատվերի շրջանակում ստենտավորում անցնել, ինչը կարող է փրկել նրանց կյանքը: Ծրագրի մասնակից կարող են դառնալ այն անձինք միայն, որոնք ներառված չեն անվճար բուժսպասարկման, այդ թվում` ստենտավորման իրավունք ունեցող սոցիալական խմբերում:
Ծրագիրը մեկնարկել է Երեւանի 4 բուժկենտրոնում, ինչից հետո դրանում ներառվել են նաեւ մնացած բոլոր կլինիկաները, որոնք անգիոգրաֆիական ծառայություն ունեն, ինչպես նաեւ Գյումրիի եւ Գորիսի երկու մարզային կլինիկա:
Մասնագետները պնդում են, որ այդ ծրագրի ներդրումից հետո սրտի կաթվածների հետեւանքով մահացությունը Հայաստանում նվազել է:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր