Ալերգիան ամբողջ աշխարհում շարունակում է գլոբալ խնդիր մնալ` աշխարհի բոլոր երկրների առողջապահության համակարգերի լրջագույն մարտահրավերներից մեկը: Ալերգիայի տարբեր ձեւերով մարդկանց թիվն աշխարհում շարունակում է աճել եւ առայժմ անհնար է խոսել ոչ միայն իրավիճակի վերահսկողության, այլեւ նույնիսկ դրա կայունացման մասին: Այդ մասին NEWS.am Medicine-ի թղթակցի հետ զրույցում հայտնել է Ալերգոլոգիայի եւ իմունոլոգիայի երեւանյան կենտրոն հիմնադիր Տիգրան Դավթյանը:
Այսօր` սեպտեմբերի 29-ին Երեւանում ընթանում է Մոլեկուլային ալերգոլոգիայի դպրոցը, որի ընթացքում, նշել է Տիգրան Դավթյանը, հայտնի միջազգային դասախոսները հայ մասնագետներին պատմում են տարբեր երկրներում ալերգիկ հիվանդությունների ախտորոշման, բուժման եւ կանխարգելման մոտեցումների մասին: Դասախոսություններով հանդես են գալիս, մասնավորապես, պրոֆեսորներ Ֆելիքս Գաստագերը եւ Վիկտորիա Ղարիբը Վիեննայի բժշկական համալսարանից եւ Ալեքսանդր Հիլը INUNIMAI-ից (International Network of University for Molecular Allergology and Immunology).
Դպրոցը նախատեսված է ալերգոլոգների, ԼՕՐ մասնագետների, մաշկաբանների, թերապեւտների, թոքաբանների, մանկաբույժների եւ բոլոր հետաքրքրված մասնագետների համար:
Տիգրան Դավթյանը նշել է, որ ամեն տարի աշխարհը փոխվում է մեր շուրջը. փոխվում է էկոլոգիան, սնունդը, ջուրը, օդը, հետո էլ մեր կյանքում նորանոր սինթետիկ եւ կիսասինթետիկ առարկաներ են հայտնվում: Գլոբալ էկոլոգիական փոփոխությունները տարբեր կերպ են ազդում մարդու առողջության վրա. որոշ դեպքերում, երբ օրգանիզմը բախվում է որեւէ նոր, անծանոթ բանի, նա աննորմալ իմունոլոգիական պատասխան է տալիս անծանոթ նյութին ալերգիկ հակազդեցության տեսքով: Համակարգային հիվանդությունները, խրոնիկական բորբոքումները արտաքին հարուցիչներին օրգանիզմի ոչ նորմալ հակազդեցության այլ օրինակներ են:
Ամեն տարի գնալով ավելի ու ավելի շատ մարդիկ են բախվում նման հակազդեցությունների, ընդ որում, ալերգիաներ լինում են ոչ միայն երեխաների մոտ, այլեւ արդեն ձեւավորված իմունային համակարգով մեծահասակների: Այդ պատճառով անհրաժեշտ է համարժեք քայլեր ձեռք առնել ալերգիկ հիվանդությունների ախտորոշման եւ դրանց դեմ պայքարի նպատակով:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր