Ամռանը աղիքային սուր վարակիչ հիվանդությունների աշխուժացում է նկատվում. ՀՀ առողջապահության նախարարության հիվանդությունների վերահսկման եւ կանխարգելման կենտրոնի գլխավոր տնօրենի տեղակալ Նունե Բակունցը լրագրողներին պատմել է, թե ինչպես կարելի է այդ վարակներից խուսափել:
Ահա թե ինչ խորհուրդներ է նա տվել.
• Խստորեն հետեւեք անձնական հիգիենային եւ ձեռքերը հաճախակի օճառով լվացեք, քանի որ բազմաթիվ մանրէներ եւ հարուցիչներ հենց կեղտոտ ձեռքերի միջոցով են օրգանիզմ ներթափանցում:
• Լավ լվացեք հում վիճակում օգտագործվող ցանկացած սննդամթերք, մասնավորապես մրգերն ու բանջարեղենը։ Լվանալ դրանք պետք է մաքուր, խմելու որակի ջրով՝ անկախ այն բանից, թե որտեղ եւ ինչ պայմաններում են դրանք աճեցվել. նույնիսկ եթե խոսքը ձեր այգու մասին է, դրանց վրա, միեւնույն է, կարող են վտանգավոր մանրէներ լինել։
• Կանաչեղենը օգտագործելուց առաջ լավ լվացեք։ Այն շատ ավելի դժվար է մաքրվում, քան մրգերն ու բանջարեղենը, այդ պատճառով ցանկալի է՝ որոշ ժամանակ մաքուր ջրում պահել, իսկ հետո մանրամասն լվանալ։
• Պատրաստի սննդամթերքի հետ զգույշ եղեք։ Ամռանը ցանկացած սննդամթերք ավելի շուտ է փչանում, ուստի անչափ կարեւոր է պատրաստի սննդամթերք (մասնավորապես՝ մսամթերք, կաթնամթերք, կրեմ պարունակող հրուշակեղեն եւ ձկնեղեն) այնպիսի վայրից գնել, որտեղ դրանք սառնարանային պայմաններում են պահպանվում։
• Հատկապես տեղում պատրաստվող պաղպաղակին ուշադրություն դարձրեք, խորհուրդ է տալիս Նունե Բակունցը։ Այն սովորաբար ջերմային մշակում չի անցնում եւ կարող է վտանգավոր լինել։
• Ինքնուրույն հավաքված սունկ մի կերեք (լինք), քանի որ կարող եք թունավորը անվտանգի հետ շփոթել եւ թունավորվել։
• Ճաքած ու փչացած մրգեր կամ բարջարեղեն (լինք) մի գնեք՝ դրանք կարող են հարուցիչներ պարունակել եւ աղիքային վարակների առաջացման պատճառ դառնալ։
• Սնունդն աշխատեք մեկ անգամվա համար պատրաստել եւ երկար ժամանակ չպահպանել։ Պատրաստի սնունդը պահեք սառնարանում՝ փակ տարայի մեջ։
• Սառնարանում հում եւ եփած սնունդն իրարից առանձին՝ տարբեր տարաներում պահեք, որպեսզի հում մթերքից մանրէները եփածին չանցնեն։
• Աշխատեք թեթեւ սնունդ օգտագործել, իսկ ծանր, յուղոտ կերակուրները ցանկալի է առավոտյան կամ գոնե ցերեկն ուտել, բայց ոչ՝ երեկոյան։
• Շատ հեղուկ խմեք։
Իհարկե, ոչ ոք աղիքային վարակներից ապահովագրված չէ, բայց եթե հետեւեք վերը նշված խորհուրդներին, կարող եք հնարավորինս հեռու մնալ վարակներից եւ այլ խնդիրներից։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր