11 կգ քաշի կորուստ՝ երկու ամսվա ընթացքում. շարունակում ենք նիհարել մասնագետի հետ

«Դա Վինչի» բժշկական կենտրոնի դիետոլոգ Հասմիկ Աբովյանի հետ նախնական զրույցին հենց այսպիսի արդյունք էր խոստացվել՝ մոտ 10 կգ՝ երկու ամսվա ընթացքում: 40 օր անց 9,4 կգ կորցնելով՝ կարծում էի, թե հետագա 20 օրերին եւս 3-4 կգ-ից կազատվեմ, սակայն դիետոլոգը նախազգուշացրել էր, որ ինձ դադարի շրջան է սպասում: Եվ հենց այս փուլում հասկացա, թե որքան հեշտ է հավելյալ կիլոգրամներ ձեռք բերել եւ որքան դժվար՝ ազատվել դրանցից:

Երրորդ քսանօրյակի արդյունքը 1,7 կգ-ի կորուստն է: Նախորդ փուլերի արդյունքների համեմատ՝ աննշան ձեռքբերում է թվում, սակայն, երբ Հասմիկ Աբովյանի խորհրդով, փորձում ես պատկերացնել, թե մաքուր ճարպի որչափ ծավալի մասին է խոսքը, հասկանում ես, որ օրգանիզմդ հսկայական զանգվածից է ազատվել: Մեկ բան եւս պարզ է՝ այսուհետ այն ավելի մեծ դժվարությամբ է յուրաքանչյուր հավելյալ կիլոգրամից հրաժարվելու, եւ արդյունքի հասնելու համար քրտնաջան աշխատանք է հարկավոր:

Այդուհանդերձ, մինչ այժմ գրանցված արդյունքներն ակնառու են, ինչը չի կարող չոգեւորել: Ճանապարհի կեսին կանգ առնելու ցանկություն բոլորովին չունեմ, հարկավոր է նախանշված արդյունքին հասնել: Իսկ առջեւում դեռեւս երկրորդ սահմանագիծն է՝ 65 կգ արդյունքով:

Մինչ այդ, չորրորդ փուլի չափումների արդյունքներն են՝

Քաշ –  67,2 կգ (68.9; 72.8; 78.3)

Իրանի շրջագիծ – 86 սմ (89; 91; 100)

Կոնքերի շրջագիծ –  104 սմ (105; 108; 114)

Կրծքի շրջագիծ –  101 սմ (101; 103; 106)

Որովայն – 95 սմ (95; 105; 112):

Հետևեք NEWS.am Medicine-ին Facebook-ում և Twitter-ում