GlaxoSmithKline բրիտանական դեղագործական ընկերությունը դեղամիջոցների վերահսկման եվրոպական գործակալությանը մալարիայի դեմ կիրառման ենթակա նոր պատվաստանյութ է ներկայացրել, որը Աֆրիկայում բնակվող երեխաների համար է մշակված: Գործակալությունը պատրաստվում է, առողջապահության համաշխարհային կազմակերպության հետ համատեղ, պատվաստանյութի փորձարկումներ նախաձեռնել, հաղորդում է Medical Daily-ն:
Մալարիայի մակաբույծը մարդկանց մոծակի խայթոցի միջոցով է փոխանցվում: Ամեն րոպե Աֆրիկայում բնակվող մեկ երեխա այս հիվանդության զոհն է դառնում: Ընդ որում, վարակի տարածման դեպքերի 90 տոկոսը հենց այս մայրցամաքում են գրանցվում:
RTS,S անունը կրող պատվաստանյութը մալարիայի Plasmodium falciparum մակաբույծի համար է նախատեսված, որն առավելապես Սահարա անապատին հարող երկրներում է տարածում գտել:
Բրիտանական ընկերության ներկայացուցիչների խոսքով, գիտնականներն ավելի քան 30 տարի նշված պատվաստանյութը ստանալու ուղղությամբ են աշխատել: Նշվում է նաեւ, որ RTS,S-ի գինը բավականին ցածր է լինելու. դեղագործական ընկերությունը մտադիր է, արտադրական ծախսերը ծածկելուց բացի, առավելագույնը 5 տոկոսի չափով շահույթ ապահովել, որը պետք է մալարիայի դեմ երկրորդ սերնդի կամ արեւադարձային այլ հիվանդությունների դեմ առաջնային պատվաստանյութերի մշակմանը միտված գիտահետազոտական աշխատանքների ֆինանսավորմանն ուղղվի:
Ընկերության մասնագետները վստահ են, որ ներկայացված պատվաստանյութը աֆրիկացի երեխաների՝ մալարիայի դեմ պաշտպանությունը ապահովելու նշանակալի ներուժ ունի, թեեւ Սահարա Անապատին հարող 7 երկրների 11 շրջաններում իրականացված առաջնային էտապի փորձարկումները որոշակիորեն հիասթափություն են պատճառել վերլուծաբաններին: Նախնական տվյալների համաձայն, RTS,S-ի երեք չափաբաժինը, կլինիկական եւ ագրեսիվ մալարիայից պաշտպանության տեսանկյունից, համապատասխանաբար 56 եւ 47 տոկոս արդյունավետություն է ապահովել: Ընդ որում, չափաբաժինները յուրաքանչյուր անգամ մեկ ամիս ընդմիջումով են նշանակվել:
RTS,S-ը երեխաների իմունային համակարգին մալարիայի P. falciparum մակաբույծի՝ արյան շրջանառության մեջ ներթափանցումը եւ լյարդի բջիջների ախտահարումը կանխարգելող խթան է հաղորդում:
GSK ընկերությունը մինչ այժմ ավելի քան 350 մլն ԱՄՆ դոլար է ներդրել՝ պատվաստանյութի մշակման գործին եւ մտադիր է առաջիկայում եւս 260 մլն դոլարի չափով ներդրում կատարել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր