Մանկական կուրության կանխարգելման գերազանցության կենտրոնը կբացվի սեպտեմբերի վերջին

ՀՀ առողջապահության նախարար Արմեն Մուրադյանը օգոստոսի 29–ին Վերարտադրողական առողջության, պերինատալոգիայի, մանկաբարձության եւ գինեկոլոգիայի հանրապետական ինստիտուտում տնօրեն Ռազմիկ Աբրահամյանի ուղեկցությամբ  ծանոթացավ  շինարարական աշխատանքների ընթացքին:  2013 թվականին մեկնարկած աշխատանքների ավարտից հետո ինստիտուտը կհամալրվի նոր մասնաշենքով, որտեղ  կկազմակերպվի 5-6 նոր բաժանմունք, այդ թվում` մանկական կուրության կանխարգելման գերազանցության առաջին կենտրոնը:  Շուրջ երկու տարի տեւած նախապատրաստական մանրակրկիտ աշխատանքից հետո այցելուների համար կենտրոնն իր դռները կբացի ընթացիկ տարվա սեպտեմբերի վերջին:

«Գերազանցության կենտրոնը կգործի  Երեւանի Վերարտադրողական առողջության, պերինատալոգիայի, գինեկոլոգիայի եւ մանկաբարձության ինստիտուտի շենքում: Կենտրոնի առաքելությունը  մանկական կուրության կանխարգելումն ու անհասության ռետինոպաթիա  հիվանդության դեմ պայքարն է»,-ասաց Ռազմիկ Աբրահամյանը: Նրա խոսքով` ինստիտուտում լայն թափով  իրականացվող  շինարարական աշխատանքների ավարտը նախանշված է 2015 թվականի վերջին: Շինարարությունն իրականացվում է  բացառապես ինստիտուտի ֆինանսական միջոցների հաշվին` առանց հավելյալ օժանդակության:

Վերարտադրողական առողջության, պերինատալոգիայի, մանկաբարձության եւ գինեկոլոգիայի հանրապետական ինստիտուտը  հանրապետության ծննդօգնություն իրականացնող ամենամեծ հիմնարկներից մեկն է, որտեղ մատուցվում է  մանկաբարձա-գինեկոլոգիական համալիր ծառայություն` սպասարկելով ողջ հանրապետության ազգաբնակչությանը, հատկապես՝ մարզերից ուղեգրված ծանր դեպքերը:

Առաջիկայում ինստիտուտում նախատեսվում է ընդլայնել եւ արդիականացնել անհաս եւ ցածր քաշով ինտենսիվ թերապիայի կարիք ունեցող նորածինների բաժանմունքը, մասնավորապես`  նրանց տեսողության հետազոտության ներդրումը, ներգանգային արյունազեղումների ժամանակին ախտորոշումը, որի համար կառուցվում է կից բաժանմունք։

Նախատեսվում է նաեւ բոլոր ծննդաբերությունների եւ ծննդկանների համար ունենալ անհատական հիվանդասենյակներ, ինչպես նաեւ արդիական պայմաններ խնամողների համար։

Նախարարը բարձր գնահատեց ինստիտուտի զարգացմանը միտված փոփոխությունները:

Ռազմիկ Աբրահամյանը նշեց, որ  իր ղեկավարած կառույցում իրականացվող բոլոր բարեփոխումներն առաջին հերթին ուղղված են մեր երկրում պերինատալ ծառայության զարգացմանը:

Հետևեք NEWS.am Medicine-ին Facebook-ում և Twitter-ում