Սիգարետն ու աղը ռեւմատոիդ արթրիտի առաջացմա՞ն են հանգեցնում

Եթե ոչ միայն ծխող եք, այլ նաեւ՝ աղի ուտեստներ եք սիրում, ապա, Rheumatology ամսագրում հրապարակում գտած հետազոտական տվյալների համաձայն, ռեւմատոիդ արթրիտի առաջացման վտանգը կրկնակի անգամ պետք է աչքի առաջ ունենաք:

Հիշյալ եզրահանգմանը եկած փորձագետները ռեւմատոիդ արթրիտով ախտորոշված՝ 386 ծխող եւ 1886 չծխող մարդկանց սննդակարգի եւ ֆիզիկական ծանրաբեռնվածության վերաբերյալ տվյալներ, ինչպես նաեւ արյան նմուշներ են հավաքագրել: Համեմատական վերլուծության արդյունքում պարզվել է, որ ծխող մադրկանց մոտ աղի չարաշահումը հիվանդության առաջացման կրկնակի ռիսկ է ենթադրում, հաղորդում է Medical Daily-ն:

«Հետազոտության արդյունքների համաձայն, ծխող մարդկանց մոտ ռեւմատոիդ արթրիտի առաջացման ռիսկը 54 տոկոսով աղի չարաշահմանն է պարտական», - նշել է Շվեդիայում գործող Ումեո համալսարանի հանրային առողջության, կլինիկական բժշկության եւ ռեւմատոլոգիայի ամբիոնի ներկայացուցիչ, հետազոտողական խմբի ղեկավար Բյորն Սունդստրոմը՝ հավելելով, թե բացահայտումը կարող է լույս սփռել այն հարցի վրա, թե ինչ գործընթացների արդյունքում են ծխող մարդիկ հիվանդության նկատմամբ խոցելի դառնում:

«Եզրահանգումը, թե ծխող մարդկանց շրջանում աղի չարաշահումը ռեւմատոիդ արթրիտի առաջացման ռիսկի կարեւոր գործոն է հանդիսանում, կարող է նոր ինտրիգ մտցնել հիվանդության զարգացման համար պատասխանատու մեխանիզմների բացահայտման հարցում», - նկատել է նա: 

Ռեւմատոիդ արթրիտը վերջինն է ծխելու սովորության բացասական հետեւանքների երկար ցանկին միացել: Հիվանդությունների վերահսկման եւ կանխարգելման ամերիկյան կենտրոնի ցուցմամբ, սիգարետի ծուխը մարդու գրեթե բոլոր օրգաններին վնաս հասցնելու եւ, ՄԻԱՎ-ի, թմրամոլության, ալկոհոլիզմի, ճանապարհային վթարների ու հրդեհի արդյունքում գրանցված մահացության ընդհանուր մակարդակի հետ համեմատությամբ, առավել բարձր ցուցանիշ դրսեւորելու հատկություն ունի:

Հետևեք NEWS.am Medicine-ին Facebook-ում և Twitter-ում