Բոլոր բժիշկներն էլ աշխատանքի ընթացքում երբեմն բախվում են զվարճալի դեպքերի: Վարակաբանների մոտ նման պատմությունները հազվադեպ են: Դե՝ չափազանց լուրջ ոլորտ է: Սակայն Հայաստանի առողջապահության նախարարության գլխավոր վարակաբան Արա Ասոյանը NEWS.am Medicine-ի թղթակցի հետ զրույցում զվարճալի մի դեպք հիշեց:
Մի անգամ նրանց հիվանդանոցում մարզից մի երեխա է եղել՝ ծանր մենինգիտով: Բավական երկար է պառկել, եւ մինչ երեխայի վիճակը շատ ծանր է եղել, գլխավոր վարակաբանը հաճախ է այցելել փոքրիկին եւ ուշադիր հետեւել բուժման ընթացքին: Իսկ երբ երեխայի վիճակը կայունացել է, բժիշկը սկսել է ավելի շատ ուշադրություն հատկացնել ավելի ծանր հիվանդներին:
Մի օր բժշկի աշխատասենյակ է մտնում այդ երեխայի հայրը, եւ նրանց միջեւ հետեւյալ զրույցն է տեղի ունենում.
- Բժիշկ, իսկ ինչո՞ւ դուրս չեք գրում իմ երեխային: Չէ՞ որ նա ավելի լավ է:
- Նա իսկապես ավելի լավ է զգում: Խոսեմ նրան բուժող բժշկի հետ, տեսնենք, թե երբ կարելի է դուրս գրել:
Արա Ասոյանը զանգահարում է երեխային բուժող բժշկին, հետաքրքրվում, թե ինչ վիճակում է հիվանդը հիմա եւ երբ դուրս կգրեն: Բժիշկը պատասխանում է, որ երեխայի մոտ ամեն ինչ կարգին է, սակայն արյան մեջ լեյկոցիտների քանակը դեռեւս նորմայից շատ է՝ 15.000: Այսինքն՝ դուրս կգրեն, երբ լեյկոցիտների քանակը կարգավորվի:
Անջատելով հեռախոսը՝ բժիշկը դիմում է երեխայի հորը.
- Հասկանո՞ւմ եք, երեխայի մոտ դեռեւս փոքրիկ խնդիր կա, եւ մենք կկարողանանք նրան դուրս գրել այդ խնդիրը լուծելուց հետո միայն:
- Ի՞նչ խնդիր, - հետաքրքրվում է հայրը:
- Անալիզներում ինչ-որ բան դեռեւս կարգին չէ:
- Իսկ ի՞նչ:
- Դժվար թե հասկանաք, դա զուտ բժշկական պահ է:
- Ոչ, ես կհասկանամ, - պնդում է հայրը:
- Նրա անալիզներում լեյկոցիտները չափազանց շատ են:
- Որքա՞ն շատ:
- 15.000:
- Հասկացա, - գլխով է անում երեխայի հայրը եւ չգիտես ինչու՝ ձեռքը գրպանը տանում: Հանում է դրամապանակը, 15.000 դրամ հաշվում եւ դնում սեղանին: - Իսկ հիմա կարո՞ղ ենք դուրս գրել:
Վարագույր:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր