• Latest news

Օստեոպորոզի պրոֆիլակտիկա. Ինչպե՞ս է հարկավոր սնվել եւ ապրել

21 հոկտեմբերի, 2014  16:39

Օստեոպորոզը շատ տհաճ եւ վտանգավոր հիվանդություն է, որի հետեւանքով նույնիսկ ամենաթեթեւ վնասվածքը կարող է լուրջ կոտրվածքներ առաջացնել: Օստեոպորոզը բուժել, իհարկե, հնարավոր է, սակայն, ինչպես այլ հիվանդությունների դեպքում, ավելի դյուրին է այն կանխարգելելը:

Օստեոպորոզի պրոֆիլակտիկայի մասին պետք է նախապես մտածել, ցանկալի է դեռեւս մանուկ տարիքում, երբ մարդու ոսկորներն աճում եւ զարգանում են՝ կալցիումի պաշար կուտակելով: Ի՞նչ է պետք անել օստեոպորոզի կանխարգելման համար:

1. Սնունդ

Սնունդը մեծ դեր է խաղում ոսկրերի ձեւավորման գործում: Եթե ցանկանում եք առողջ, ամուր ոսկորներ ունենալ, հարկավոր է շատ կալցիում եւ D վիտամին օգտագործել, հատկապես օրգանիզմի ակտիվ աճի շրջանում: Պակաս կարեւոր չեն նաեւ այլ հանքանյութերը, մասնավորապես՝ մագնեզիումը եւ ֆոսֆորը, որոնք նույնպես սնուցում են ոսկորները:

Ո՞ր մթերքներում կարելի է գտնել այս բոլոր նյութերը:

Մասնագետները խորհուրդ են տալիս առաջին հերթին ամենօրյա սննդակարգում ներառել կաթնաթթվային մթերքներ (հատկապես պինդ տեսակի պանիրներ), ձվի դեղնուց, ծովային ձկնեղեն, պահածոյացված ձուկ, թարմ կանաչեղեն, հատիկավորներ եւ լյարդ:

Ի դեպ, սննդակարգում աղի ավելցուկը նպաստում է օրգանիզմից կալցիումի մաքրմանը, այդ պատճառով մասնագետները խորհուրդ են տալիս սահմանափակել աղի օգտագործումը:

Բացի այդ, սննդակարգում ճարպերի ցածր առկայությունը խանգարում է հանքանյութերի, այդ թվում՝ կալցիումի յուրացմանը, այդ պատճառով մշտապես դիետաների հետեւող աղջիկները բոլորից շատ են ենթարկվում օստեոպորոզով հիվանդանալու վտանգին:

2. Ֆիզիկական ակտիվություն

Պարզվում է՝ ֆիզիկական ակտիվությունը նույնպես պգնում է պահպանել ոսկրերի խտությունը, սակայն հարկավոր է սպորտով զբաղվել մանուկ տարիքից, քանի որ օստեոպորոզի առաջացումից հետո մարզումներն այլեւս ոչ մի օգուտ չեն տալիս:

Օստեոպորոզի պրոֆիլակտիկայի համար մասնագետները խորհուրդ են տալիս մարզանք անել, պարերով, ֆիթնեսով, աէրոբիկայով զբաղվել կամ մարզասարքերի վրա վարժություններ կատարել: Իհարկե, չափն անցնել պետք չէ. ծանրաբեռնվածությունը պետք է չափավոր լինի եւ չգերծանրաբեռնի օրգանիզմը:

Ի դեպ, 3-4 ամսվա ընթացքում անկողնային ռեժիմը 10-15%-ով նվազեցնում է ոսկրազանգվածի ծավալը, այդ պատճառով առանց ծայրահեղ անհրաժեշտության պասիվ կենսակերպ վարել խորհուրդ չի տրվում:

3. Կենսակերպ

Ծխելն ու ալկոհոլը ոչ միայն մեծացնում են քաղցկեղի տարբեր տեսակների առաջացման վտանգը, այլեւ բացասաբար են անդրադառնում ոսկրերի առողջության վրա: Նույնիսկ ամենափոքր չափաբաժնով ալկոհոլը նվազեցնում է օստիոսինթեզը՝ ոսկրային նոր հյուսվածքների ձեւավորումը եւ խանգարում է դեպի ոսկրեր, հատկապես դեպի ողնաշար հանքանյութերի մուտքը: Իսկ ծխելը, ինչպես հայտնի է, մազանոթների երկարատեւ կծկում է առաջացնում եւ խոչընդոտում դեպի ոսկրեր հանքանյութերի մուտքը:

Ի դեպ, սուրճը նույնպես բավական վնասակար է ոսկորների համար, քանի որ այն նպաստում է ոսկրերից կալցիումի հեռացմանն ու երիկամների միջոցով օրգանիզմից դրա դուրս գալուն: Եթե ցանկանում եք առողջ ոսկորներ ունենալ, ցանկալի է հրաժարվել ալկոհոլից, ծխախոտից եւ սուրճից:

Շատ մասնագետներ նաեւ խորհուրդ են տալիս 50 տարեկանից հետո ժամանակ առ ժամանակ ստուգել ոսկրերի խտությունը. դա արվում է հատուկ սարքի՝ դենսիտոմետրի օգնությամբ: Երեւանյան հիվանդանոցներում, ի դեպ, Ջոն Բելիզիկյանի շնորհից 7 դենսիտոմետր կա: Նման մեկական սարք էլ գոյություն ունի Գյումրիում եւ Արցախի մայրաքաղաք Ստեփանակերտում:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է