• Latest news

Հայաստանում աղիքի քաղցկեղի վիրաբուժության նոր՝ կյանքի առավել բարձր որակ ապահովող մեթոդներ են գործարկվում

25 հոկտեմբերի, 2014  19:55

Հայաստանում ուղիղ աղիքի դիստալային հատվածի քաղցկեղի բուժմանը միտված երկու նոր վիրահատական մեթոդներ են մշակվել, որոնք կարող են տվյալ հիվանդությունն ունեցող մարդու համար կյանքի առավել բարձր որակ ապահովել: Միքայելյանի անվան վիրաբուժության ինստիտուտի կոլոպրոկտոլոգիայի բաժանմունքի ղեկավար Ալեքսանդր Աղավելյանի հեղինակած մեթոդներից առաջինը դեռեւս 1999թ.-ից է գործում, երկրորդը՝ 2009թ.-ից: Հոկտեմբերի 24-ի երեկոյան ուռուցքաբաններն ու պրոկտոլոգները «կլոր սեղանի» շուրջ էին հավաքվել՝ նոր մեթոդների արդյունավետությունը քննարկելու եւ իրականացված վիրահատությունների արդյունքնները գնահատելու նպատակով:

Ինչպես պրոֆեսոր Աղավելյանն է NEWS.am Medicine-ի թղթակցի հետ զրույցի ընթացքում մեկնաբանել, ուղիղ աղիքի դիստալային հատվածի կամ հետանցքային ուղու քաղցկեղը արդիական խնդիր է ինչպես ողջ աշխարհի, այնպես էլ՝ Հայաստանի համար, քանի որ բավականին հաճախ ի հայտ եկող հիվանդություն է հանդիսանում:  «Դրա բուժման նպատակով ողջ աշխարհում ստանդարտ վիրահատություն՝ ուղիղ աղիքի եւ այն փակող ապարատի՝ սֆինկտերի հետ միասին հեռացմամբ բնորոշվող որովայնաշեքային էքստիրպացիա է իրականացվում: Վիրահատությունը որովայնի առաջնային պատին սիգմաձեւ աղիքի՝ սիգմոստոմայի կամ կոլոստոմայի տեսքով արտաբերմամբ է ավարտվում: Նմանատիպ պրոցեդուրայի ենթարկված մարդիկ ողջ կյանքի ընթացքում ստիպված են կղանքընդունիչներ կրել: Սա է ուղիղ աղիքի էքստիրպացիայի «ոսկե ստանդարտը», մինչդեռ կղանքընդունիչները լուրջ խնդիր են դառնում՝ հիվանդների համար», - նշել է նա: 

Քննարկմանը ներկա բժիշկները նույնպես կղանքընդունիչների հարուցած անհարմարություններն են ընդգծել: Ինչպես «Իզմիրլյան» ԲԿ-ի պրոկտոլոգիայի բաժանմունքի ղեկավար, պրոֆեսոր Արամ Հակոբյանն է նկատել, դրանք ոչ միայն հոգեբանական, այլ նաեւ՝ զուտ նյութական բնույթի կարող են լինել: «Մեկ կղանքընդունիչի արեժը 800-1000 դրամ է. հացի փող չկա, իսկ մարդն ամեն оր կղանքի հետ ամենաքիչը մոտ երկու հազար դրամ է դուրս մղում, թանկարժեք կղանք է ստացվում», - նշել է պրոֆեսորը:

1999թ.-ին պրոֆեսոր Աղավելյանը ազդրի նազելի մկանների կիրառմամբ աղիքների փակող գործառույթի մասնակի վերականգնում ենթադրող մեթոդ էր առաջարկել: Առաջին՝ դիակների նկատմամբ իրականացված փորձարկումները ցույց էին տվել, որ հիշյալ մկանը կարող է շեքի հատվածում կիրառվել: Նոր մեթոդի գործարկմամբ առաջին վիրահատությունը Երեւանում՝ Պրոկտոլոգիայի ինստիտուտում (ներկայիս «Իզմիրլյան» ԲԿ)՝ 42 տարեկան տղամարդու նկատմամբ է իրականացվել:

Այնուհետեւ մեթոդի կիրառմամբ շուրջ 20 վիրահատություններ են իրականացվել, բոլորն էլ՝ հաջող ելքով: Վիրահատությունների թիվը մեծ չէ այն պատճառով, որ դրանք ոչ բոլոր հիվանդներին են ցուցված: Պրոֆեսոր Աղավելյանի մեկնաբանմամբ, հիվանդի տարիքը մեծ կարեւորություն ունի, քանի որ ծերացմանը զուգընթաց նազելի մկանի թառամում է նկատվում: Բացի այդ, անոթային խանգարումները եւս կարող են լուրջ հակացուցումների տեղիք տալ: Այդուհանդերձ, ցուցման առկայության պարագայում առաջարկվող մեթոդը հիվանդների համար կյանքի առավել բարձր որակ է երաշխավորում. չէ՞ որ ստիպված չեն կղանքընդունիչ կրել եւ կարող են ինքնուրույն զուգարան գնալ: 

Ավելի ուշ՝ 2009թ.-ին, Ալեքսանդր Աղավելյանը հետանցքային քաղցկեղի վիրաբուժության եւս մեկ մեթոդ էր առաջարկել: Այս պարագայում արդեն ոչ թե ազդրի նազելի մկանի, այլ լեւատորների՝ հետանցքը բարձրացնող մկանների կիրառություն է ենթադրվում: «Ես այդ մկանները աղիքին միացնելով՝ նոր սֆինկտեր եմ ստեղծում: Սա առավել ադապտացված վիրահատություն է», - նշել է պրոֆեսորը՝ հավելելով, որ երկրորդ մեթոդի գործարկմամբ վիրաբուժական միջամտության եւս 18 դեպքեր են արձանագրվել: Ընդ որում, վիրահատությունները մեկ հստակ առավելություն ունեն. դրանք կարող են նաեւ տարեց մարդկանց նկատմամբ իրականացվել:

Ինչպես նշվել է կլոր սեղանի ժամանակ, այս եղանակը ստանդարտ էքստիրպացիայի համեմատությամբ ավելի լավ արդյունքներ է ապահովում թե հիվանդի կյանքի որակի առումով, թե ֆունկցիոնալ ցուցիչներով։

Կոլորեկտալ քաղցկեղը ինդուստրիալ աշխարհում մահացության պատճառների առաջատարներից է։ Տարեկան աշխարհում կոլորեկտալ քաղցկեղի 800 000 նոր դեպք է գրանցվում եւ 440 000  մահ։ Հայաստանում հաստ աղիքի քաղցկեղը ուռուցքային հիվանդությունների շարքում մահացության երրորդ պատճառն է, իսկ ընդհանուր մահացության կառուցվածքում՝ 6–րդը։ 

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է