• Latest news

Տղամարդու անպտղություն. փաստեր եւ առասպելներ

27 հոկտեմբերի, 2014  10:21

Հանրության շրջանում տղամարդու անպտղությանը վերաբերող բազմաթիվ փաստեր եւ առասպելներ են շրջանառվում, որոնք տարանջատման կարիք ունեն: Ստորեւ ճշմարտությունը երեւակայության արգասիքից բաժանելու փորձ ենք ներկայացնում.

Ջերմային ազդեցության վտանգները

Ամորձիները, որովայնի հետ համեմատությամբ, մի փոքր ավելի ցածր ջերմություն ունեն, քանի որ իրանից դուրս են գտնվում: Բացի այդ էլ, հավելյալ ջերմությունը վտանգավոր է սեռական օրգանների համար, քանի որ կարող է սպերմատոզոիդների ոչնչացման հանգեցնել: Իսկ դրանց վերականգնման համար, որպես կանոն, շուրջ երեք ամիս է պահանջվում: Ուստի պատահական չէ, որ, համաձայն տարածված կարծիքի, ներքնազգեստը, նոութբուքը, սաունան եւ տաք լոգանքը կարող են ամորձիներին հավելյալ ջերմության հաղորդման եւ սպերմատոզոիդների քանակի կրճատման պատճառ դառնալ: Տեսնենք, թե հիշյալ պնդումներից որն է ճիշտ:

Ներքնազգեստ. տղամարդիկ հաճախ են երկմտում, թե արդյոք պետք է, կիպ վարտիքների փոխարեն, առավել թեթեւ նստող ներքնազգեստ կրեն՝ ամորձիները մարմնից հնարավորինս հեռու՝ հավելյալ ջերմությունից զերծ պահելու համար:

«Հետազոտության արդյունքները ցույց են տալիս, որ դա իրականում այնքան էլ կապ չունի: Այնպես որ կարող են, ըստ ճաշակի, ցանկացած տիպի վարտիք կրել», - հավաստիացնում է Քլիվլենդի կլինիկային կից գործող տղամարդու պտղաբերության կենտրոնի տնօրեն, բուժհաստատության ուրոլոգիայի բաժանմունքի ղեկավար դոկտոր Էդմունդ Սաբանեն:

Նոութբուք. շարժական համակարգիչներն այնպես են նախագծվել, որ ծնկներին դրած աշխատելու համար հարմար լինեն, ուստիեւ ժամանակի ընթացքում կարող են ամորձիների ջերմության բարձրացման պատճառ դառնալ: Ճիշտ է՝ հատուկ պաշտպանիչ բարձիկներ էլ գոյություն ունեն, որոնք ամորձիները զերծ են պահում ջերմային ազդեցությունից, բայց միայն՝ կարճ ժամանակով: Ուստի դոկտոր Սաբանեն խորհուրդ է տալիս նոութբուքը սեղանին դրած աշխատել:

Սաունա եւ տաք լոգանք. նույնիսկ տաք սաունայում ամորձիները, իրենց առանձնահատուկ կառույցի շնորհիվ, մի փոքր ցածր ջերմություն ապահովելու հնարավորություն են ձեռք բերում, սակայն տաք լոգանքի պարագայում ամեն ինչ ավելի խնդրահարույց կարող է դառնալ, քանի որ սեռական օրգաններն ամբողջությամբ ընկղմվում են տաք ջրի մեջ եւ հովացման հնարավորությունից զրկվում:

Բջջային սարքավորումներից արտազատված ռադիացիայի վտանգները

«Բջջային հեռախոսներն ամորձիներից հնարավորինս հեռու պետք է պահվեն», - խորհուրդ է տալիս դոկտոր Սաբանեն՝ նշելով, որ նմանատիպ սարքավորումներից արտազատվող ռադիացիայի բացասական ազդեցությունը՝ սպերմատոզոիդների նկատմամբ, մի շարք հետազոտություններով է հաստատվել:

Քիմիական ազդեցության վտանգները

Ամենից առաջ հարկ է նշել, որ որոշ դեղամիջոցներ՝ օրինական, թե անօրինական, կարող են բացասական անդրադարձ ունենալ՝ տղամարդու պտղաբերության վրա, ուստի, նախքան նոր դեղահաբ ընդունելը կամ բուժման կուրս անցնելը, հարկ է՝ մասնագետի հետ խորհրդակցել: 

Ծխախոտ. ապացուցված է, որ ծխելու սովորությունից հրաժարվելուց հետո պտղաբերության շոշափելի բարելավում է նկատվում, քանի որ, ինչպես սերմնահեղուկի հետազոտություններն են ցույց տալիս, սիգարետի ծուխը սպերմատոզիոդների թվի, ակտիվության մակարդակի եւ ինքնաբուխ շարժունակության կորստի կարող է հանգեցնել: Բացի այդ էլ, նիկոտինը կարող է սպերմատոզոիդների մեջ առկա ԴՆԹ-ի աղճատման եւ գենետիկ հումքի վնասման պատճառ դառնալ: Դոկտոր Սաբանեն բոլոր հիվանդներին խորհուրդ է տալիս մեկընմիշտ վերջ տալ ծխելու սովորությանը: Կամ գոնե՝ երեխայի բեղմնավորման ընթացքում:

Մարիխուանա. բազմաթիվ հետազոտությունների արդյունքում վկայություններ են ձեռք բերվել առ այն, որ մարիխուանան կարող է նշանակալի ազդեցություն ապահովել՝ տղամարդու պտղաբերության վրա: Դրա ներգործությամբ նախ եւ առաջ սպերմատոզոիդներին շարժունակությունը եւ տեստոստերոնի մակարդակն է տուժում: Այս պարագայում եւս դոկտոր Սաբանեն խորհուրդ է տալիս գոնե երեխայի բեղմնավորման ընթացքում վնասակար սովորությունից հրաժարվել:

Անաբոլիկ ստերոիդներ. Որոշ մարդկանց թվում է, թե անաբոլիկ ստերոիդների ազդեցությամբ կարելի է տեստոստերոնի մակարդակի աճի եւ պտղաբերության բարելավման հասնել: Իրականում ճիշտ հակառակը կարող է տեղի ունենալ: Ուստի, նախքան ստերոիդների օգտագործումը, հատկապես եթե բեղմնավորման փորձեր եք կատարում, հարկավոր է մասնագետի խորհրդատվությանը դիմել:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է