Էբոլայով վարակված առաջին հիվանդների հետազոտման կադրեր են հրապարակվել

Բելգիայի արեւադարձային բժշկության ինստիտուտը անհայտ վիրուսի ուսումնասիրման գործընթացը նկարագրող երեք տեսանյութ է հրապարակել, որոնք, Het Laatste Nieuws պարբերականի հավաստիացմամբ, Էբոլա հեմոռագիկ տենդի՝ ներկայումս Արեւմտյան Աֆրիկայի մի շարք երկրներում մոլեգնող համաճարակի ակունքների վերաբերյալ պատմական կադրեր են պարունակում:

1976թ.-ին բելգիացի Պիտեր Պիոտի գլխավորությամբ գործող մի խումբ գիտնականներ Զաիր (ներկայումս՝ Կոնգո – խմբ.) էին մեկնել՝ Մարբուրգյան վիրուսն ուսումնասիրելու նպատակով: Սակայն Յամբուկի անունը կրող հեռավոր գյուղում բժիշկների ճանապարհը հետագայում Էբոլա գետի պատվին իր անվանումը ստացած ամենավտանգավոր միկրոօրգանիզմներից մեկի հետ էր խաչվել:

Եզակի կադրերում երեւում է, թե ինչպես են գիտարշավի մասնակիցները շփման մեջ մտնում՝ հիվանդների հետ, նրանց առողջական վիճակի ուսումնասիրմամբ եւ հետազոտություններով զբաղվում, այնուհետեւ էլ՝ շարունակում ճանապարհորդությունը Աֆրիկայով: Տեսագրության երկրորդ մասում նույնիսկ գիտնականներին տեղափոխող ինքնաթիռի վայրէջքն է ցուցադրվում:

Առողջապահության համաշխարհային կազմակերպությունը Էբոլա վիրուսով վարակման առաջին դեպքը պաշտոնապես 1976թ.-ի օգոստոսի 26-ին է արձանագրել: Հիվանդության առաջին կրողը միսիոներական դպրոցի 44-ամյա ուսուցիչ էր: Անհայտ հիվանդության բացահայտման օրվանից հետո՝ առաջին շաբաթվա ընթացքում վիրուսը 9 մարդու կյանք էր խլել, իսկ համաճարակի ողջ ընթացքում 318 վարակվածներից 280-ը մահացել էին:

ԱՀԿ-ի տվյալներով, ընթացիկ տարվա հոկտեմբերի 25-ի դրությամբ հեմոռագիկ տենդով վարակման դեպքերի թիվը ավելի քան 10 հազար է կազմում, որոնցից 4922-ը՝մահվան ելքով: Հիշյալ դեպքերի մեծամասնությունը Լիբերիային, Գվինեային եւ Սիերա-Լեոնեին են բաժին հասնում: Ամենածանր իրադրությունը Լիբերիայում է ստեղծվել, որտեղ մահվան դեպքերի թիվը 2705 է կազմում:

Հետևեք NEWS.am Medicine-ին Facebook-ում և Twitter-ում