Պետք է ամեն ինչ անենք մանկական մահացությունը կանխելու համար. նախարար

ՀՀ առողջապահության նախարար Արմեն Մուրադյանի նախագահությամբ տեղի ունեցավ մայրական մահացության, մանկաբարձության եւ գինեկոլոգիայի խորհրդի հերթական նիստը։

Արմեն Մուրադյանը շեշտեց, որ մայրական մահացության դեպքերի վերլուծության նպատակը, անկախ իրավական եւ վարչական տույժերից, կազմակերպչական եւ բժշկական բացթողումների առկայության բացահայտումն է եւ առաջիկայում դրանց բացառումը։

Մանրամասն ներկայացվեցին նախարարի հրամանով ստեղծված հանձնաժողովների կատարած ուսումնասիրությունների արդյունքները։ Խորհրդի անդամների լրացուցիչ հարցերն ուղղված էին ստեղծված իրավիճակների եւ իրականացված քայլերի առավել հստակ գնահատմանը։

Օրակարգում ընդգրկված դեպքերը մանրամասն վերլուծության ենթարկվեցին։ Խորհրդի անդամներն ու նախարարության գլխավոր մասնագետները ներկայացրեցին իրենց տեսակետները։

«Մայրական մահացությունն ամենից ցավոտ հարցն է, եւ պետք է ամեն ինչ անենք դրանք հնարավորինս կանխելու համար»,-ասաց նախարարը` ընդգծելով, որ բուժհիմնակներում թույլ տրված կազմակերպչական բացթողումների համար հավասարապես պատասխանատու են ինչպես հերթապահող կամ վարող բժիշկները, այնպես էլ` բուժհաստատությունների ղեկավարները։

Արմեն Մուրադյանը հանձնարարեց շրջաբերականներ ուղարկել առաջնային օղակի մանկաբարձագինեկոլոգիական բոլոր կազմակերպություններին, որպեսզի խստորեն հետեւեն հղիության վարման եւ ծննդալուծման գործող չափորոշիչներին։ Նախարարը միաժամանակ գլխավոր մանկաբարձ-գինեկոլոգ Ռազմիկ Աբրահամյանին հանձնարեց մասնագետների հետ քննարկել եւ առաջարկություններ ներկայացնել հղիության վարման գործող չափորոշիչներում փոփոխություններ կատարելու, մասնավորապես` հղիության միջին ժամկետում էլեկտրասրտագրություն ներառելու մասին։

Արմեն Մուրադյանն առաջնային օղակի եւ ծննդատների մասնագետներին խստորեն հանձնարարեց աշխատել համագործակցված, հղիներին այս կամ այն բուժհաստատություն ուղեգրելիս լիարժեք տեղեկատվություն տրամադրել, այնուհետեւ հետաքրքրվել նրանց հետագա վիճակով։

Նաեւ հանձնարարվեց Արմավիրի եւ Գավառի մարզերի հղիների մահվան դեպքերը եւս մեկ անգամ խորությամբ քննարկել առողջապահության վարչություններում` ուշադրության կենտրոնում պահելով բոլոր մանրամասներն ու հանգամանքները։

«Անրաժեշտ է նոր մոտեցումներ որդեգրել, օգտվել ընձեռված բոլոր հնարավորություններից, այդ թվում` հեռաբժշկությունից»,-ասաց նախարարը։

Արմեն Մուրադյանի հրամանով այսուհետեւ կքննարկվեն նաեւ կրիտիկական վիճակներից ծննդկանների դուրս բերման բոլոր դեպքերը։ Դրանց խորությամբ վերլուծությունն էական օժանդակություն կլինի ապագայում նման դեպքերի զարգացումը կանխելու եւ մայրական մահացության ցուցանիշները նվազեցնելու գործին։

Հետևեք NEWS.am Medicine-ին Facebook-ում և Twitter-ում