Համաշխարհային Բանկի աջակցությամբ ՀՀ առողջապահության նախարարության կողմից 2013 թվականից մեկնարկել են «Հիվանդությունների կանխարգելում եւ վերահսկում» ծրագրի նախապատրաստական աշխատանքները: Ծրագրի նպատակներից է ոչ վարակիչ հիվանդությունների, մասնավորապես զարկերակային գերճնշման, շաքարային դիաբետի եւ արգանդի պարանոցի քաղցկեղի վաղ հայտնաբերումը, կանխարգելումը եւ վերահսկումը:
Ծրագրի շրջանակում 2015թ. հունվարից 35-ից 68 տարեկան ՀՀ բոլոր քաղաքացիները հնարավորություն ունեն անվճար հետազոտվել իրենց սպասարկող պոլիկլինիկայում կամ ամբուլատորիայում` զարկերակային գերճնշման եւ շաքարային դիաբետի ախտորոշման, իսկ 30-ից 60 տարեկան բոլոր կանայք`արգանդի պարանոցի նախաքաղցկեղի վաղ ախտորոշման եւ քաղցկեղի կանխարգելման նպատակով:
Համաձայն Առողջապահության համաշխարհային կազմակերպության (ԱՀԿ) 193 անդամ երկրների վիճակագրության` վերջին տարիներին աշխարհում բնակչության հիվանդացության հիմնական պատճառը ոչ վարակիչ հիվանդություններն են (ՈՎՀ), մասնավորապես, արյան շրջանառության համակարգի հիվանդությունները (ԱՇՀՀ), չարորակ նորագոյացություններն (ՉՆ) ու շաքարային դիաբետը (ՇԴ):
ՈՎՀ-ից յուրաքանչյուր տարի մահանում է ավելի քան 36 միլիոն մարդ: Այդ հիվանդություններից մահացության բեռը բնակչության ընդհանուր մահացության կառուցվածքում կազմում է շուրջ 87%: Ավելին, մահացության դեպքերի 80%-ը (29 միլիոն դեպք) գրանցվում է ցածր եւ միջին եկամուտ ունեցող երկրներում, որոնց թվում է նաեւ Հայաստանը: Մեր երկրում ՈՎՀ-ից մահացության ընդհանուր կառուցվածքում առաջին տեղում սրտանոթային հիվանդություններն են` 48%, ապա` չարորակ նորագոյացությունները` 20,8%, եւ շաքարային դիաբետը` 4,7%:
Այսպիսով, ինչպես շատ երկրներում, Հայաստանում եւս ոչ վարակիչ հիվանդություններն ամենատարածված եւ հաշմանդամության հանգեցնող հիվանդություններն են, որոնք ախտահարում են գլխավորապես աշխատունակ տարիքի բնակչությանը:
Ներազդելով ՈՎՀ-ի առաջացման ռիսկի գործոնների վրա` հնարավոր է կանխարգելել դրանց զարգացումը, հետեւաբար շատ կարեւոր է այդ հիվանդությունների ռիսկի գործոնների վաղ հայտնաբերումը: Այն առավել մատչելի եւ հեշտ է իրականացնել առողջության առաջնային պահպանման (ԱԱՊ) գործառույթ իրականացնող բժշկական կազմակերպություններում, որոնք գործում են Հայաստանի գրեթե բոլոր բնակավայրերում (բուժակ-մանկաբարձական կետեր, գյուղական առողջության կենտրոններ եւ ամբուլատորիաներ, պոլիկլինիկաներ): Ի սկզբանե ոչ վարակիչ հիվանդությունների կանխարգելման տեսակետից առավել կարեւոր է հիվանդության զարգացման «ռիսկի խմբի» որոշումը եւ վերջինիս հիման վրա սքրինինգային հետազոտությունների իրականացումը:
Առավել տարածված ՈՎՀ զարգացման ռիսկի գործոնների տարածվածությունը գնահատվել է Առողջապահության համակարգի գործունեության գնահատման (ԱՀԳԳ) 2007, 2009 եւ 2012թթ. ընտրանքային հետազոտության համեմատական տվյալների հիման վրա: Ռիսկի գործոնների տարածվածությունը Հայաստանի 20 տարեկան եւ բարձր բնակչության շրջանում ունի հետեւյալ պատկերը.
Ռիսկի գործոն |
2007 |
2009 |
2012 |
Ամեն օր ծխախոտի օգտագործում (տղամարդ) |
55,7% |
58,0% |
55,5% |
Ալկոհոլային խմիչքների օգտագործում (տղամարդ) |
11,4% |
16,6% |
13% |
Զարկերակային բարձր ճնշում (>140/90 մմ ս.ս.) |
13,4% |
11,9% |
37% |
Ավելորդ քաշ/գիրություն եւ ճարպակալում |
52,8% |
53,6% |
57% |
Ֆիզիկական թերակտիվություն |
20,7% |
17,5% |
50% |
Առողջապահության համակարգի գործունեության գնահատման տվյալները փաստում են, որ բնակչության մեծամասնությունը դրսեւորում է ռիսկային վարքագիծ, ինչը հանդիսանում է հիվանդացության եւ մահացության հիմնական պատճառներից մեկը: Ծխախոտի օգտագործման եւ ալկոհոլի չարաշահման ցուցանիշները զգալիորեն բարձր են տղամարդկանց շրջանում, ընդ որում, դրանք կտրուկ աճում են աշխատունակ տարիքային խմբերում եւ կապակցված են բարեկեցության ու կրթական մակարդակի հետ:
Բնակչության շրջանում զգալիորեն բարձր է ֆիզիկական թերակտիվության տարածվածությունը, որը վերջին տարիներին կտրուկ աճել է, մասնավորապես, կանանց, դեռահասների, թերի միջնակարգ եւ բարձրագույն կրթություն ունեցող բնակչության խմբերում:
2007-2009թթ. ընթացքում ավելցուկային քաշի տարածվածությունն աճի միտում է գրանցվել 20-ից 29 տարեկանների եւ միջին մասնագիտական կրթությամբ քաղաքային բնակչության շրջանում: 15 եւ բարձր տարիքի բնակչության ավելի քան մեկ երրորդն ունի բարձր զարկերակային ճնշում, որոնցից մեկ քառորդն իրազեկված չէ այդ մասին:
Առկա իրավիճակը հնարավոր է փոխել, եթե բնակչության շրջանում ձեւավորվի ժամանակ առ ժամանակ հետազոտվելու ավանդույթ, ինչպես նաեւ բարելավվեն առողջության առաջնային պահպանման հիմնարկներում իրականացվող համապատասխան ծառայությունները:
ՀՀ առողջապահության նախարարությունը կոչ է անում մասնակցել անվճար հետազոտություններին եւ պահպանել առողջությունը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր