Մասնագետ՝ գրիպի դեպքում չի կարելի հակաբիոտիկներ ընդունել

Գրիպը վիրուսային հիվանդություն է, եւ այդ պատճառով գրիպի դեպքում չի կարելի հակաբիոտիկներ ընդունել եւ զբաղվել ինքնաբուժմամբ, հիշեցնում ՀՀ ԱՆ Հիվանդությունների վերահսկման եւ կանխարգելման ազգային կենտրոնի գլխավոր տնօրեն Արտավազդ Վանյանը :

«Մենք շատ անգամ ենք խոսել այն մասին, որ չի կարելի ինքնուրույն դեղեր ընտրել եւ զբաղվել ինքնաբուժությամբ: Մենք գործ ունենք վիրուսի հետ, եւ դրա դեմ կարող են պայքարել են հակավիրուսային դեղամիջոցները, այլ ոչ հակաբիոտիկները», - նշում է մասնագետը:

Նրա խոսքով՝ գրիպի եւ ՍՇ վարակների տարածումը Հայաստանում այժմ վերահսկվում է եւ հիվանդացության մակարդակը նորմայից բարձր չէ: Ծանր վիճակում գտնող հիվանդները եւս քիչ են, եւ դրանցից շատերը հայտնվում են հիվանդանոցում, ոչ թե բուն վիրուսների, այլ դրանց հետ կապված բարդացումների պատճառով (օրինակ, թոքաբորբ), որոնք ի հայտ են գալիս ինքնաբուժման արդյունքում:

Հիշեցնենք, որ գրիպի հարուցիչը վիրուսն է, իսկ հակաբիոտիկները կարող են միայն բակտերիաներ ոչնչացնել, այդ պատճառով գրիպի դեպքում դրանք օգնել չեն կարող եւ, ամենայն հավանականությամբ, վնասակար կլինեն, քանի որ գրիպի դեպքում մարդու իմունային համակարգը թուլանում է եւ օրգանիզմն ավելի անպաշտպան է դառնում, եթե մարդը հակաբիոտիկներ է ընդունում՝ էլ ավելի թուլացնելով իմունիտետը, քանի որ «վատ» բակտերիաների հետ մեկտեղ ոչնչանում են նաեւ օգտակար բակտերիաները: Իսկ թուլացած օրգանիզմում գրիպի վիրուսը սկսում է էլ ավելի ակտիվ կերպով բազմանալ՝ նպաստելով մի շարք բարդացումների ի հայտ գալուն:

Եթե դուք հիվանդացել եք, Արտավազդ Վանյանը խորհուրդ է տալիս դիմել գրանցման վայրի պոլիկլինիկա (http://med.news.am/arm/news/5130/inch-anel-ete-duq-hivandacel-eq.html) եւ հետեւել բժշկի խորհուրդներին: Իսկ ահա ինքնուրույն կամ դեղատան աշխատակցի միջոցով դեղեր ընտրել պետք չէ:

Հետևեք NEWS.am Medicine-ին Facebook-ում և Twitter-ում