Հայաստանում զգալիորեն նվազել է մանկական մահացության ցուցանիշը

Հայաստանում վերջին տարիներին զգալիորեն բարելավվել է մանկական մահացության ցուցանիշը, որն այսօր10 պրոմիլեից ցածր է, եւ սա թույլ է տալիս մեզ հազարամյակի թիրախը հաղթահարելու հավակնություն ունենալ։ Այս մասին այսօր, մարտի 26–ին, լրագրողների հետ հանդիպման ժամանակ ասաց ՀՀ առողջապահության նախարարության մայրական եւ վերարտադրողական առողջության պահպանման բաժնի պետ Գայանե Ավագյանը:

Ըստ նրա, ցուցանիշների նվազմանը հաջողվել է հասնել մի քանի պետական ծրագրի իրականացման շնորհիվ, ներառյալ Ցածր քաշով նորածինների ապրեցման ծրագիրը։ «Այսօր Հայաստանում ճիշտ խնամքի միջոցով մենք կարողանում ենք ապրեցնել 600–700 գրամ քաշով ծնված նորածիններին», – ասաց նա։ Բացի այդ, վերազինվել եւ հագեցվել են մանկական վերակենդանացման բաժանմունքները։

Կարեւոր ծրագրերի շարքում Գ. Ավագյանը նշեց նաեւ երեխայի առողջության պետական հավաստագրի ներդրումը, որը հաջորդեց ծննդօգնության պետական հավաստագրին։ «Շնորհիվ այս համակարգված միջոցառումների մեզ հաջողվել է վերջին տարիներին աննախադեպ իջեցնել մանկական մահացությունը։ Այսօր այն 10 պրոմիլեից ցածր է, որը մեզ թույլ է տալիս անգամ հազարամյակի թիրախը հաղթահարելու հավակնություն ունենալ», – ասաց նա։

Հետևեք NEWS.am Medicine-ին Facebook-ում և Twitter-ում