Ալյուրը հարստացնելու փոխարեն արժե «ցածր» կարգի ալյու՞ր արտադրել

Բարձր կարգի ալյուրն իր մեջ գրեթե ոչ մի օգտակար նյութ չի պարունակում, քանի որ դրա մշակման ընթացքում հեռացվում է օգտակար նյութերով հագեցած թեփը: Սակայն «ցածր» կարգի ալյուրներում, որտեղ ցորենը աղացվում է թեփի հետ միասին, կա թե երկաթ, թե ֆոլաթթու, եւ թե մի շարք այլ օգտակար նյութեր: Խնդիրն այն է, որ Հայաստանում «ցածր» կարգի ալյուրներ գրեթե չկան: Այս մասին լրագրողներին ասաց Հայաստանի սպառողների ազգային ակադեմիայի փոխնախագահ եւ մոնիտորինգի բաժնի ղեկավար Ռուբեն Հայթյանը:

Նրա խոսքով՝ Ռուսաստանում ըստ գործող չափորոշիչների կարելի է չորս տեսակի ալյուր ստանալ՝ բարձր, առաջին, երկրորդ եւ երրորդ կարգի: Եվ եթե բարձր կարգի ալյուրում երկաթի եւ ֆոլաթթվի կորուստ է գրանցվում՝ թեփազատման պատճառով, ապա այլ կարգի ալյուրներում այդ նյութերն առկա են՝ ընդ որում, բնական, ոչ թե սինթետիկ:

Խնդիրն այն է, որ, Ռուբեն Հայթյանի խոսքով, Հայաստանում առաջին, երկրորդ եւ երրորդ կարգի ալյուր ուղղակի չկա, գրեթե ողջ հացը պատրաստվում է բարձր կարգի ալյուրից, գուցե՝ որպեսզի հացի ինքնարժեքը բարձր լինի: Նույնիսկ այսպես կոչված «սեւ» եւ «մոխրագույն» հացերի մեծ մասը նույն բարձր կարգի ալյուրից է՝ ուղղակի ներկված:

Ռուբեն Հայթյանի խոսքով՝ երկրորդ կարգի ալյուրից պատրաստված հացում, ըստ Հայաստանի տեխնոլոգիական ակադեմիայի տվյալների, երկաթի եւ ֆոլաթթվի պարունակությունը նույնիսկ ավելին է, քան մարդուն օրական անհրաժեշտ է (7.93 միկրոգրամ՝ հացի մեկ կիլոգրամում):

Թեփի հետ կորցված նյութերով արհեստական տարբերակով ալյուրը հարստացնելու գաղափարը Ռուբեն Հայթյանը սխալ է համարում, մանավանդ որ խոսքը գնում է սինթետիկ նյութերի, այլ ոչ՝ դրանց բնական տարբերակի մասին, որը բավական թանկ է: Գուցե ավելի ճիշտ լինի արտադրել ալյուրի այլ տեսակներ՝ մասնավորապես՝ երկրորդ եւ երրորդ կարգի ալյուր, որից պատրաստված հացը կլինի օգտակար եւ առողջարար:

Հետևեք NEWS.am Medicine-ին Facebook-ում և Twitter-ում