Հուլիսի մեկից դիաբետով հիվանդ հայաստանցիները ֆրանսիական Դիաբետոն կստանան

Հուլիսի մեկից դիաբետով հիվանդ մարդիկ Հայաստանում հնդկականի փոխարեն ֆրանսիական արտադրության Դիաբետոն կսկսեն ստանալ: Այս մասին լրագրողներին հայտնեց առողջապահության նախարար Արմեն Մուրադյանը:

ՀՀ կառավարության 2015 թվականի հունվարի 30-ի «Հայաստանի Հանրապետության կարիքների համար «Դիաբետոն 60 մգ» դեղիգնման 2015-2019 թվականների գործընթացը կազմակերպելու մասին» թիվ 78-Ն որոշմամբ նախատեսում է շաքարային դիաբետով տառապող հիվանդներին ֆրանսիական «Լե Լաբողատուաղ Սեղվիե» ընկերության «Դիաբետոն ՄՌ» 60 մգ դեղի պատշաճ մակարդակով ապահովում: 

Անմիջապես արտադրող «Սերվիե» ընկերությունից 2015թ. համար ձեռքբերվող «Դիաբետոն» դեղի  համար կծախսվի 280.7 մլն դրամ (մեկ դեղահաբը` 36.7  դրամ), ինչը, նախարարի խոսքով հնարավորությւոն կտա տնտեսել 61.2 մլն  դրամ: Շաքարային դիաբետով հիվանդների 77 տոկոսը կապահովվի անհրաժեշտ հաբերով` նախորդ տարիների շուրջ 30 տոկոսի փոխարեն։

Նախարարի փոխանցմամբ՝ առաջին տիպի դիաբետով տառապող մարդիկ չեն բողոքում ստացված ինսուլինի որակից, եւ նա հույս ունի, որ շուտով չեն լինի նաեւ «դիաբետոնի» հետ կապված բողոքներ:

Նախարարը նշեց նաեւ, որ նախագծվում է նաեւ առաջին տիպի դիաբետով տառապող երեխաների համար մոտ ապագայում գնել հատուկ գրիչ-ներարկիչներ, որոնք նրանց բուժման գործընթացն ավելի հեշտ կդարձնեն:

Բացի այդ, արձագանքելով նախարարության կոչին` «Բայեր Կոնսյումեր» և «Գլաքսո Սմիթ Կլայն» դեղագործական ընկերությունների ներկայացուցչությունները վերանայել են ՀՀ-ում իրենց կողմից գրանցված և ներկվող դեղերի շուկայական գները` համապատասխանեցնելով Ռուսաստանի Դաշնության շուկայական գներին:

Նախարաի խոսքով՝ վերջին մեկ տարում դեղորայքային քաղաքականության ոլորտում ունեցած կարևոր ձեռքբերումը «Դեղերի մասին» ՀՀ օրենքի լրամշակված եւ հստակեցված տարբերակի եւ հարակից մի շարք այլ օրենքների նախագծերի ՀՀ կառավարության կողմից հավանության արժանանալն է։ Դրանցում ամրագրված են դեղերի ողջ շրջանառության, բնակչությանը որակյալ եւ անվտանգ դեղերով ապահովման, դրանց ֆիզիկական եւ տնտեսական մատչելիության գործընթացների կարգավորումը։

Եվրասիական տնտեսական միության համագործակցությունը ենթադրում է օրենսդրական ակտերի, նորմատիվ փաստաթղթերի եւ ուղեցույցների ներդաշնակեցում։ Մինչ օրս քննարկվել եւ ներդաշնակցվել է դեղերի ոլորտին առնչվող 15 նորմատիվային ակտ: Դրանք վերաբերում են գրանցման գործընթացներին, արտադրությանը, կլինիկական փորձարկումներին, դեղերի շրջանառությանը:

Հիշեցնենք, որ 2015 թվականի կարիքների համար պետական գնումների միջոցով ձեռք է բերվում 2.5 մլրդ դրամի դեղ։

Հետևեք NEWS.am Medicine-ին Facebook-ում և Twitter-ում