Միկոպլազմաներ՝ ամենափոքր, բայց ոչ անվտանգ բակտերիաները. Ռուսաստանցի պրոֆեսորի դասախոսություն

Ամենափոքր, բայց մարդուն բազմաթիվ անհարմարություններ պատճառող բակտերիաների՝ միկոպլազմաների մասին «Երեւանյան մաշկավեներոլոգիական ընթերցումներ» կոնֆերանսի ընթացքում կպատմի սեռավարակների ոլորտում մասնագիտացող բժիշկների ռուսաստանյան գիլդիայի նախագահ, պրոֆեսոր Միխայիլ Գոմբերգը:

Ինչպես նշեց NEWS.am Medicine-ի հետ զրույցում պրոֆեսորը, օրգանիզմում միկոպլազմաների առկայության մասին մարդը դժվար թե կարողանա ինքնուրույն գլխի ընկնել, քանի որ կլինիկական ախտանիշներ չկան, իսկ այդ բակտերիաները բավականին տարածված են: Շատ միկոպլազմաներ ոչ մի վտանգ չեն ներկայացնում եւ բուժել դրանք պետք չէ: Որոշ միկոպլազմաներ, սակայն, լուրջ վտանգ են ներկայացնում վերարտադրողական առողջության համար: Հենց այստեղ էլ բժիշկների ու հետազոտողների մոտ հարցեր են առաջանում, քանի որ հետազոտման ժամանակակից մեթոդները հնարավորություն տրամադրում են միկոպլազմաները մարդու օրգանիզմում գտնելու, բայց ինչ անել դրանց հետ այնուհետեւ, պարզ չէ: «Արդյո՞ք կարիք կա դրանք լիովին վերացնելու, թե որոշ դեպքերում դա պետք է, իսկ որոշ դեպքերում՝ ոչ: Ո՞ր միկոպլազմաներն են վտանգավոր, որոնք՝ ոչ: Որո՞նք են ախտորոշման ճիշտ մեթոդները», - թվարկեց բժիշկը:

«Կան այնպիսի միկոպլազմաներ, որոնք շատ վտանգավոր են: Դրանք կարող են արտաքին որեւէ ախտանիշներ չունենալ, սակայն կարող են նաեւ անպտղության հասցնել կամ հղիության ընթացքում ի հայտ եկող խնդիրների: Այդ պատճառով բուժել դրանք պետք է», - նշեց բժիշկը:

«Ես կպատմեմ անգլիացի հայտնի մի պրոֆեսորի մասին, որը, միկոլպազմաների վտանգավորությունը ապացուցելու համար, ներարկել է այն սեփական ուրետրայի մեջ, բորբոքում ստացել, իսկ այնուհետեւ բուժվել», - պատմեց ՌԴ-ից ժամանած պրոֆեսորը:

Հետևեք NEWS.am Medicine-ին Facebook-ում և Twitter-ում