Հայաստանում սեռավարակների հետ կապված որոշ միտումներ մտահոգիչ են. մաշկավեներոլոգ

Սեռական ճանապարհով փոխանցվող վարակների թիվը Հայաստանում վերջին 20 տարվա ընթացքում շարունակաբար նվազում է, եւ, ինչը շատ կարեւոր է, վերջին տաս տարիների ընթացքում չի գրանցվել բնածին սիֆիլիսի որեւէ դեպք: Այս մասին NEWS.am Medicine-ի թղթակցին հայտնեց ՀՀ Առողջապահության նախարարության գլխավոր մաշկավեներոլոգ եւ Մաշկավեներոլոգների ասոցիացիայի նախագահ Կարեն Բաբայանը «Երեւանյան մաշկավեներոլոգիական ընթերցումներ»՝ Երեւանում տեղի ունեցող կոնֆերանսի ընթացքում: Կ.Բաբայանի զեկույցը նվիրված է սեռական ճանապարհով փոխանցվող վարակներին Հայաստանում:

Նրա խոսքով, սակայն, երկրում այժմ տարօրինակ միտումներ են նկատվում, որոնք մտահոգում են բժիշկներին: Այսպես, եթե նախկինում սիֆիլիսի ակտիվ դեպքերը կազմում էին 70-80 տոկոս, իսկ լատենտ դեպքերը՝ 10-15 տոկոս, ապա այժմ հակառակ պատկերն է: Դեպքերի 80 տոկոսը լատենտային սիֆիլիսն է, եւ միայն 15 տոկոսը՝ ակտիվ: «Այսինքն՝ 100 հիվանդներից 85-ը չգիտեն, որ հիվանդ են: Չիմանալով, որ հիվանդ են՝ նրանք կարող են հիվանդության տարածման աղբյուր դառնալ», - նշեց գլխավոր մաշկավեներոլոգը՝ հավելելով, որ դրա պատճառները մի քանիսն են, եւ դրանցից մեկը հակաբիոտիկների անկանոն օգտագործումն է: Հակաբիոտիկները կարող են ճնշել հիվանդության ախտանիշները, բայց այն պահպանվում է օրգանիզմում:

Չնայած նրան, որ սեռավարակների թիվը մատների վրա կարելի է հաշվել, դրանց՝ մարդու վերարտադրողական համակարգին հասցրած վնասի պատճառով այս հիվանդությունները առաջատար են դառնում ընթացող կոնֆերանսի շրջանակներում քննարկվող խնդիրների շրջանում:

Կ.Բաբայանը նշեց, որ այսօր շատ քիչ ուշադրություն է հատկացվում սեռավարակների կանխարգելմանը, այնինչ կանխարգելումը շատ կարեւոր է ոչ միայն ինքնին, այլ նաեւ ՁԻԱՀ/ՄԻԱՎ-ի կանխարգելման համատեքստում: Ինչպես բացատրեց բժիշկը, չնայած նրան, որ ՁԻԱՀ-ը համարվում է «20-րդ դարի ժանտախտ» եւ չի բուժվում, իրականում այն այդքան վարակիչ չէ: Սակայն, հերիք է մարդը ամենասովորական տրեխամոնիազով վարակվի, այդ հիվանդությունը կարող է պատճառ դառնալ ՄԻԱՎ/ՁԻԱՀ-ով վարակվելու համար: «Այսինքն՝ սեռավարակների կանխարգելումը ինքնաբերաբար նաեւ ՄԻԱՎ/ՁԻԱՀ-ի կանխարգելում է», - նշեց Կ,Բաբայանը:

Ամփոփելով Կ.Բաբայանը նշեց, որ այս ոլորտում դեռեւս շատ անելիք կա, եւ աշխատանքները պետք է իրականացվեն բոլոր մասնագետների՝ ուռոլոգների, սեքսապաթոլոգների, գինեկելոգների կողմից համատեղ: Մի խոսքով՝ պետք է հարցի համալիր լուծում մշակել:

Հետևեք NEWS.am Medicine-ին Facebook-ում և Twitter-ում