Հաշմանդամություն ունեցող մարդկանց համար նախատեսված սարքավորումների գնման վաուչերային համակարգի ներդրումը Հայաստանում կօգնի բարձրացնել այդ սարքավորումների որակը: Նման տեսակետ են արտահայտել սահմանափակ հնարավորությւոններով մարդկանց համար նախատեսված զանազան սարքավորումների ու հարմարանքների ցուցահանդեսի կազմակերպիչներն ու մասնակիցները։ Ցուցահանդեսը անցել է Երեւանում սեպտեմբերի 2-ին:
Ինչպես լրագրողներին պատմել է «Սիմս-2» ռուսական ընկերության ներկայացուցիչ Սարգիս Բադալյանը, ցուցահանդեսում ներկայացված էին տարբեր ընկերությունների ապրանքներ, որոնք սահմանափակ հնարավորություններով մարդկանց հնարավորություն են տալիս ապրել լիարժեք կյանքով: Խոսքը եւ հաշմանդամների սայլակի, եւ ձեռնափայտի, եւ լոգարանի համար նախատեսված զանազան հարմարանքների եւ շատ այլ բաների մասին է: Այդ բոլոր պարագաները, Բադալյանի խոսքով, կհեշտացնեն ոչ միայն հաշմանդամություն ունեցող մարդկանց, այլեւ նրանց խնամող հարազատների կյանքը:
Հաշմանդամների «Փյունիկ» հայկական ասոցացիայի ղեկավար Հակոբ Աբրահամյանն էլ իր հերթին նշեց, որ որոշումներ կայացնելու համար պատասխանատուները պետք է հասկանան, որ չի կարելի ներմուծել մեծ քանակության նույնատեսակ սայլակներ ու բաժանել դրանք հաշմանդամներին, շատ ավելի ճիշտ է ներդնել վաուչերների համակարգ ու այդ մարդկանց հնարավորություն տալ ինքնուրույն ընտրել իրենց պահանջներին համապատասխանող սարքավորում՝ վճարելով դրա դիմաց վաուչերներով:
«Ունիսոն» հասարակական կազմակերպության ղեկավար Արմեն Ալավերդյանը նույնպես համաձայնեց, որ Հայաստանում արժե ներդնել վաուչերների համակարգը: Հաշմանդամություն ունեցողներին հաշմանդամների անվճար սայլակներ են տրամադրում երեք տարին մեկ անգամ, սակայն դրանք անորակ են ու հաճախ չեն համապատասխանում մարդու տարիքին:
Արմեն Ալավերդյանը ցույց տվեց իր անձնական հաշմանդամային սայլակը, որն ընդամենը մեկ տարի է օգտագործում, բայց որն արդեն բավականին մաշվել է ու մի քանի անգամ տարվել վերանորոգման:
Իսկ եթե երկրում ներդրվի վաուչերային համակարգ, ու մարդիկ ընտրելու հնարավորություն ստանան, կհայտնվի առողջ մրցակցություն, ինչը կստիպի սարքավորումներ արտադրողներին բարելավել իրենց արտադրանքի որակը:
Ցուցահանդեսը կազմակերպվել էր «Փյունիկ» հաշմանդամների հայկական ասոցացիայի եւ «Բարրի» ընկերության կողմից: Կազմակերպիչների խոսքերով՝ մոտակա ամսվա ընթացքում Երեւանում կբացվի խանութ, որտեղ ներկայացված բոլոր սարքավորումները հնարավոր կլինի գնել կամ պատվիրել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր