Շատ մարդիկ ՄԶՑ-ն (մարմնի զանգվածի ցուցիչը) օգտագործում են` որոշելու ճարպակալման կամ ավելորդ քաշի աստիճանը: Նոր հետազոտության հեղինակները ապացույցներ են ներկայացնում առ այն, որ մարդու մարմնի զանգվածի ցուցիչը (կիլոգրամներով քաշը բաժանած հասակի վրա եւ չափվում է մ2-ով) առողջության ցուցանիշ չէ: Հետազոտության արդյունքները հրապարկվել են International Journal of Obesity գիտական ամսագրում:
Լոս Անջելեսի Կալիֆորնիայի համալսարանի գիտնականները Ջանեթ Տոմիյամայի (Janet Tomiyama) ղեկավարությամբ վերլուծել են ՄԶՑ-ի եւ սրտանյութափոխանակային առողջության միջեւ կապը: Սրտանյութափոխանակային բժշկական ցուցանիշների մեջ են մտնում զարկերակային ճնշման, տրիգլիցերիդների, խոլեստերինի, գլյուկոզայի մակարդակը, ինսուլինին դիմադրողականությունը եւ ռեակտիվ С սպիտակուցի մակարդակը:
Վերլուծության արդյունքները ցույց են տալիս, որ բարձր ՄԶՑ-ով մարդկանց գրեթե կեսն իրականում նորմալ սրտանյութափոխանակային ցուցանիշներ ունի: Իսկ ՄԶՑ-ի 35-ից բարձր ցուցիչ ունեցող, այսինքն գեր համարվող մարդկանց 15 տոկոսն առողջ է:
Պրոֆեսոր Տոմիյաման ասում է. «Շատ մարդիկ համարում են, որ ճարպակալումը մահացու դատավճիռ է: Բայց տվյալները ցույց են տալիս, որ տասնյակ միլիոնավոր մարդիկ, որոնք ավելորդ քաշ եւ ճարպակալում ունեն, լիովին առողջ են»:
Հետազոտությունը ցույց է տվել նաեւ, որ նորմալ դիապազոնում գտնվող ՄԶՑ ունեցող մարդկանց ավելի քան 30 տոկոսն իրականում առողջական խնդիրներ ունի: Պրոֆեսոր Տոմիյաման այժմ մտադիր է հետեւել բարձր ՄԶՑ ունեցող մարդկանց, որոնք նորմալ սրտանյութափոխանակային ցուցանիշներ ունեն:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր