Զիկա վիրուսն ուսումնասիրում են 3D-տպիչով տպագրված մինիուղեղի վրա
22:32 25 ապրիլի, 2016Johns Hopkins University-ի գիտնականները փորձում են պարզել, թե Զիկա վիրուսն ինչ եղանակով է հարձակվում զարգացող սաղմի գլխուղեղի բջիջների վրա: Այդ նպատակով նրանք 3D տպիչով տպագրված մինիուղեղ են օգտագործում:
Հուո-լի Մինգը եւ հետազոտական խմբից իր գործընկերները ուղեղի մինի-մոդել են ստեղծել, որի չափը չի գերազանցել քորոցի գլխի չափը եւ որը նմանակել է սաղմի գլխուղեղը հղիության առաջին եռամսյակում: Այդ մինիուղեղի օգնությամբ հետազոտությունները կարողացել են հետեւել, թե վիրուսն ինչպես է հարձակվում նյարդային նախաբջիջների վրա` խախտելով գլխուղեղի հետագա զարգացումը:
Հետագայում հեղինակները հետազոտություններ են կատարել ավելի խոշոր մոդելների վրա, որոնք համապատասխանել են սաղմի գլխուղեղին հղիության երկրորդ եռամսյակում: Վիրուսը ոչ միայն վնասում էր նյարդային նախաբջիջները, այլեւ ազդում էր հասուն նեյրոնների վրա, եւ այդ ամենը հանգեցնում էր ուղեղի զարգացման դանդաղելու եւ կեղեւի ձեւավորման խանգարման:
Հիշեցնենք, որ միայն վերջերս է հաստատվել կապը Զիկա վիրուսի եւ միկրոցեֆալիայի միջեւ: Գիտնականները վաղուց էին ենթադրում, որ միկրոցեֆալիայի եւ Զիկա վիրուսի միջեւ կապ կա, սակայն դա վերջերս է ապացուցվել: Ավելին, ցույց է տրվել, որ վիրուսը կարող է նաեւ այլ խախտումներ առաջ բերել, որոնց թվում են վիժումը եւ մահացած երեխայի ծնունդը:
Այդ հետազոտության մասին պատմում է Cell ամսագիրը: