ԱՄՆ ուրոլոգիական ասոցիացիան Հայաստանի ռեզիդենտներին ուսումնական նյութերին հասանելիություն կտրամադրի

ԱՄՆ ուրոլոգիական ասոցիացիան (American Urological Association, AUA) Հայաստանի ռեզիդենտներին ուսումնական բոլոր նյութերին օնլայն հասանելիություն կտրամադրի՝ հայկական ծագմամբ ԱՄՆ ուրոլոգների (մոտ 50 մարդ) կողմից հատկացված դրամաշնորհի շրջանակներում: Այս մասին NEWS.am Medicine-ի հետ զրույցում Հայաստանի ուրոլոգիական ասոցիացիայի 18-րդ տարեկան կոնգրեսի ժամանակ ասել է ԱՄՆ ուրոլոգիական ասոցիացիայի նախագահ Ռիչարդ Բաբայանը:

«Դրանք այն նյութերն են, որոնց ԱՄՆ-ում հասանելիություն ունեն բոլոր ռեզիդենտները»,- նշել է նա՝ հավելելով, որ դա Հայաստանի եւ ԱՄՆ ասոցիացիաների համագործակցության ճանապարհին առաջին քայլն է, եւ այդ համագործակցությունը կընդլայնվի: Հեռանկարում նրանց միջեւ կհաստատվի նույնպիսի համագործակցություն, ինչպիսին կա Ուրոլոգների եվրոպական ասոցիացիայի՝ European Association of Urology (EAU) հետ: Այսինքն՝ Հայաստանի ասոցիացիայի տարեկան ժողովների ժամանակ կկազմակերպվեն AUA կուրսեր:

Նրա խոսքով՝ պլանավորվում է Հայաստանի ուրոլոգների տարեկան կոնգրեսին ամերիկացի բժիշկների մշտական մասնակցություն, եւ արդեն այժմ ընթացիկ կոնգրեսում մասնակցում են այնպիսի ականավոր մասնագետներ, ինչպիսին է Մեյո կլինիկայից Ստեֆան Բուրջյանը:

Ռիչարդ Բաբայանը նշել է, որ Հայաստան է այցելում վեցերորդ անգամ, առաջին անգամ եկել է 1989 թվականին, Սպիտակի երկրաշարժից հետո: Ամերիկացի բժշկի խոսքով՝ Հայաստանում այն ժամանակվա եւ ներկայիս ուրոլոգիայի վիճակի տարբերությունը վիթխարի է: Ըստ նրա, անցած տարիների ընթացքում իր ջանքերի շնորհիվ Հայաստանում ռեզիդենտների համար ներդրվել է ուսումնական ծրագիր, իսկ այսօր այս ծրագրի շնորհիվ Հայաստանում արդեն այնպիսի մասնագետներ կան, ինչպիսն են  Հայաստանի ուրոլոգիական ասոցիացիայի ղեկավար Արթուր Գրաբսկին եւ 18-րդ տարեկան կոնգրեսի նախագահ Ռուբեն Հովհաննիսյանը:

«Այս աշխատանքը կշարունակվի, որպեսզի Հայաստանն այն ստանդարտներին, այն նորմերին հասնի, որոնք կիրառվում են զարգացած երկրներում»,- ասել է նա:

[gallery id=71]

Լուսանկարները՝ Արսեն Սարգսյանի