Գիտնականներն իմպլանտներ են ստեղծել, որոնք կարող են աճել մարդու հետ միասին
23:49 28 սեպտեմբերի, 2016Մինեսոտայի համալսարանից ամերիկացի գիտնականները լրագրողներին հայտնել են, որ առաջին անգամ հաջողվել է բացառիկ իմպլանտներ ստեղծել, որոնք ի վիճակի են աճել մարդու հարազատ օրգանների նման:
Այդ գյուտը կարող է իսկական առաջընթաց ստեղծել մանկական բժշկության մեջ, որովհետեւ անհամեմատ ավելի հեշտ կլինի երեխաներին օգնել օրգանների փոխպատվաստման դեպքում:
Ներկայումս բժիշկներն արդեն կարողացել են լաբորատորիայում կենդանի արյունատար անոթներ աճեցնել: Նման անոթները կարող են հսկայական օժանդակություն հանդիսանալ սրտի բնածին արատներով երեխաների բուժման գործում, որոնց մարմնում սինթետիկ գրաֆտներ են տեղադրում կամ փոխարինում են դրանք եւ այդ նպատակով անհրաժեշտ է լինում բաց սրտի վրա հինգ եւ ավելի վիրահատություն կատարել: Տրանսպլանտների դեպքում, որոնք կարող են աճել մարմնում եւ ռեգեներացիայի ենթարկվել, ավելորդ վիրաբուժական միջամտություն չի պահանջվի, նշանակում է` դրանց հետ կապված հնարավոր բարդություններ եւս չեն առաջանա:
Համալսարանի աշխատակիցները նախ լաբորատոր պայմաններում անոթանման խողովակներ են աճեցրել: Ընդ որում, նրանք ոչխարի դոնորական կենսանյութ են օգտագործել. հենց այդ բջիջներից են ստեղծվել ապագա անոթները: Դրանից հետո` մոտ 5 շաբաթ անց, հետազոտողները հատուկ վարակազերծող միջոցի օգնությամբ «լվացել են» ոչխարի դոնորական բջիջները` թողնելով միայն խողովակների «հիմնակմախքը»: Փորձարկման հաջորդ փուլում խողովակներով փոխարինել են թոքային զարկերակի մի մասը` անոթի, որով արյունը սրտից անցնում է թոքերին: Նման մանիպուլյացիաներն իրականացվել են երեք գառնուկի հետ:
Այդ գառնուկների սեփական բջիջները նորից տեղադրել են արդեն տեղադրված խողովակների մեջ` նրանց հնարավորություն տալով աճել, ինչպես նաեւ բացառելով հյուսվածքների պոկումը, որպես օրգանիզմի համար թշնամական հյուսվածքներ: Բոլոր երեք առանձնյակներն աճել են` դառնալով հասուն ոչխարներ, նրանց վիճակը գնահատվում է որպես նորմալ: Աշխատանքի համահեղինակ Ռոբերտ Տրանկվիլոն (Robert Tranquillo) հայտնել է, որ սա առաջին դեպքն է, երբ բժիշկները նոր նյութ են ներմուծում հիվանդի մարմին, եւ այդ նյութը կարող է այնտեղ աճել: Նա հավելել է, որ դա հյուսվածքների աճեցման տեխնոլոգիայի եւ ռեգեներատիվ բժշկության «իդեալական միություն» է եղել, երբ հյուսվածքն աճեցվել է լաբորատորիայում, հետո հիվանդի մարմնում ընթացող բնական գործընթացներն այն դարձյալ կենդանի են դարձրել:
Գիտնականները նախատեսել են հետագայում մարդկանց մասնակցությամբ կլինիկական փորձարկումների անցնել: