Շուտով տղամարդկանց համար խմելու հակաբեղմնավորիչներ կստեղծվեն
22:41 24 հոկտեմբերի, 2016Wolverhampton University-ի հետազոտողները նոր նյութ են ստեղծել, որը կարող է այլ կերպ ակտիվացնել պրոտեինը, որի շնորհիվ սերմնաբջիջները տեղաշարժվում են: Տեղաշարժվելու հնարավորությունից զրկված սերմնաբջիջները չեն կարողանա բեղմնավորել ձվաբջիջները: Այսպիսով, այն ընդունող տղամարդը որոշ ժամանակ անց անպտուղ կդառնա:
Կանանց համար խմելու հակաբեղմնավորիչներ ստեղծվել են 1960-ական թվականներին: Այդ ժամանակից ի վեր գիտնականները փորձել են հակաբեղմնավորիչներ ստեղծել նաեւ տղամարդկանց համար, սակայն ապարդյուն. հորմոնային բոլոր դեղահաբերն ու ներարկումներն արդյունավետ չեն եղել: Իսկ Wolverhampton University-ի գիտնականների առաջարկած նոր մեթոդն արմատապես տարբերվում է բոլոր նախորդներից. սերմնաբջիջի վրա ներգործող պեպտիդը վերջինին զրկում է տեղաշարժվելու եւ ձվաբջիջներին հասնելու հնարավորությունից:
Կանայք հակաբեղմնավորիչը պետք է ընդունեն դաշտանային փուլի սկզբում, իսկ անցանկալի հղիությունից «պաշտպանությունն» ապահովվում է միայն մեկ շաբաթ անց: Նշված պեպտիդի հիման վրա ստեղծված տղամարդկանց համար հակաբեղմնավորիչները փոքր-ինչ ավելի արագ կսկսեն ներգործել՝ մի քանի րոպեից մինչեւ մի քանի ժամից:
Պրոֆեսոր Ջոն Հոուլը նշել է, որ նոր պեպտիդի լաբորատոր թեստերը խոստումնալից են: «Արդյունքը շշմեցուցիչ է եւ գրեթե ակնթարթային: Եթե առողջ սերմնաբջիջին հավելենք այդ նյութը, մի քանի րոպե հետո այն չի կարող տեղաշարժվել»,- ասել է նա:
Տղամարդկանց համար նախատեսված խմելու հակաբեղմնավորիչները հակադարձ ազդեցությամբ կարող են օգտակար լինել այն կանանց պարագայու, որոնք ինչ-ինչ պատճառներով չեն ցանկանում հորմոնային հակաբեղմնավորիչներ ընդունել:
Պեպտիդները կարճ շղթաներով ամինաթթուներ են, որոնք ներգործում են մարդու բջիջի աշխատանքի վրա: Գոյություն ունեն բնական եւ սինթետիկ պեպտիդներ: Գիտնականների իրականացրած հետազոտությամբ պարզվել է, որ որոշակի պեպտիդներ ընդունակ են թափանցել սերմնաբջիջների մեջ: