Չինաստանում չորս ձեռքով ու չորս ոտքով երեխա է ծնվել (ֆոտո)

Չինաստանում բժիշկները հաջողությամբ հեռացրել են մանկիկի ավելորդ վերջույթները, որը ծնվել է չորս ոտքով ու չորս ձեռքով չզարգացած երկվորյակ եղբոր հետ սերտաճելու պատճառով։ Տղան ծնվել է ապրիլի 2-ին Գուանդուն նահանգում։ Բարեբախտաբար, չզարգացած երկվորյակը գլուխ չի ունեցել։

«Այս կինը պետք է երկվորյակներ բերեր, բայց նրանցից մեկը լրիվ չի զարգացել, դեֆորմացվել է եւ կպել մյուսին մարմնի մասում», - բացատրել է այս արատը Guangzhou Women and Children's Medical Center հիվանդանոցի գլխավոր վիրաբույժ Յու Ջիկանը։

Երեխայի քաշը ծնվելուց եղել է նորմայի սահմաններում՝ 3 կիլոից մի քիչ ավել։ Ավելորդ ոտքերն ու ձեռքերը հեռացնելուց հետո նրա քաշը նվազել է 600 գրամով։ Մանկիկի մոտ ախտորոշել են նաեւ պնեւմոնիա եւ սրտի ի ծնե հիվանդություն։

Երեխայի հայրը պատմել է, որ փոքրիկին ման է տվել տարբեր հիվանդանոցներով, բայց ոչ մի բժիշկ չի կարողացել բացատրել ավելորդ վերջույթների ի հայտ գալու պատճառը։ Երեխայի  արատի համար տղամարդը իրեն է մեղադրում, քանզի բավարար հոգածություն չի ցուցաբերել կնոջ հանդեպ հղիության ժամանակ։

Ինչպես հայտնում է Daily Mail-ը, ներկա պահին երեխան գտնվում է հիվանդանոցում նորմալ վիճակում, նրա կյանքին եւ առողջությանը ոչինչ չի սպառնում։