2006թ.-ին ամուսնու՝ Ջոյի հետ միասին Օփրային հյուրընկալված 44-ամյա Քրիսթին Թրինգալի Նունեսը հետաքրքիր բացահայտում էր արել: Պարզվել էր՝ յոթ տարի տեւած ամուսնությունից եւ երկու երեխաներ ունենալուց հետո զույգերը հասկացել են, որ նույնասեռական կողմնորոշում ունեն, հաղորդում է The Daily Mail-ը:
Ութ տարի անց կրկին հեռուստաեթերում հայտնվելով՝ Քրիսթինը պատմել է, որ նախկին ամուսնուց բաժանվելուց հետո հասցրել է մեկ անգամ եւս, հիմա արդեն՝ «իր կյանքի միակ սիրո, հանուն իրեն մեծագույն զոհաբերության գնացած» Ջեկիի հետ ամուսնանալ:
Ջեկիի խոսքով՝ Քալիֆորնիա նահանգի Սակրամենտո քաղաքի բնակիչ, յոգայի ուսուցանմամբ զբաղվող Քրիսթինը դեռ հեռուստաեթերից է դուր եկել իրեն, երբ Օփրային էր հյուրընկալվել:
«Երբ տեսախցիկը նրա վրա կանգնեց, անմիջապես մտածեցի. «Տեր Աստված, որքան գեղեցիկ է: Փողոցում նկատելով՝ երբեք չէի մտածի, թե կարող է լեզբուհի լինել», - հիշողություններն է կիսել մեկ տարի առաջ միաժամանակ տղամարդ եւ ամուսին դարձած Ջեկին:
Երբ հանդիպեցին՝ անմիջապես սեր ծագեց, եւ շատ չանցած՝ Քրիսթինն ամուսնության առաջարկ արեց նրան: Սակայն այդ ժամանակ Քալիֆորնիա նահանգում նույնասեռական ամուսնությունները դեռեւս օրինականացված չէին:
Եւ Ջեկին սկսեց սեռը փոխելու մասին մտածել:
«Օրենքի տեսանկունից պետք է տղամարդ համարվեի», - պատմում է Ջեկին:
Այնպես որ, 2013թ. առաջին ամիսներին երկակի մաստէկտոմիայի (կրծքագեղձերի հեռացման) ենթարկվելու ուժ գտավ իր մեջ: Ապրիլ ամսին արդեն ծննդյան վկայականի մեջ սեռը արական էր նշված:
Քրիսթինը Ջեկիի արարքը սիրո լավագույն արտահայտումն է համարում: «Ոչ ոք առավել ոչինչ չի արել ինձ համար», - գտնում է նա:
Երջանիկ զույգը ներկայումս Սակրամենտոյում է բնակվում:
Քրիսթինի նույնասեռական ամուսնու ճակատագրի մասին մասնրամասներ չեն հաղորդվում: Հայտնի է միայն, որ հաճախ չի շփվում Քրիսթինի հետ, թեեւ վերջինս դեմ չէ սերտ հարաբերություններին. չէ՞ որ երկու որդի ունեն…
Այսպիսի բաներ…