Գանգի մի մասը կորցրած տղամարդը եռաչափ տպիչի օգնությանը կդիմի (ֆոտո)
19:20 30 օգոստոսի, 2014Գանգի մի մասը կորցրած չինացի ֆերմերը եռաչափ տպիչի օգնությամբ վերականգնողական վիրահատության է ենթարկվելու:
Հու անունը կրող 46-ամյա չինացին շենքի երրորդ հարկից ընկնելու արդյունքում գլխի ծանր վնասվածք է ստացել: Նրա գանգի վերին ձախ հատվածն ամբողջությամբ փշրվել է եւ դատարկ մնացել: Վնասվածքի արդյունքում առաջացած ոսկրային կտորները միմյանց ամրացկելու հնարավորության բացակայության պայմաններում բժիշկներին այլեւս ոչինչ չէր մնում, քան հեռացնել ու դեն նետել դրանք:
Ներկայումս չինացի մասնագետները մտադիր են, վերականգնողական վիրահատության իրականացման նպատակով, եռաչափ տպիչի օգնությանը դիմել՝ Հուի գանգից պակասող հատվածի հստակ կրկնօրինակը տիտանից պատրաստելու համար, որն այնուհետեւ գերամուր ամրակների օգնությամբ նրա գանգին է միակցվելու, հաղորդում է Daily Mail-ը:
Վիրահատության հաջող ընթացքի պարագայում տիտանից պատրաստված «հավելադիրը» ֆերմերին լիարժեք վերականգնվելու հնարավորություն կընձեռի, այնպես, որ արտաքինից ոչ ոք չի կարող ասել, թե տղամարդը երբեւէ գլխի ծանրագույն վնասվածք է ունեցել: