K1 եւ K2 վիտամինները բարձրացնում են առողջ ծերության հավանականությունը. Nutrients
10:33 19 հունիսի, 2023Շվեդիայի Կարոլինսկայի ինստիտուտի ծերացման հետազոտությունների կենտրոնի կողմից անցկացված ուսումնասիրության համաձայն՝ վիտամին K-ն, հատկապես դրա K1 եւ K2 տեսակները, կարեւոր են առողջության համար եւ կարող են դրական ազդեցություն ունենալ ծերացման գործընթացի վրա: Որոշ փորձագետներ մատնանշում են կապը վիտամին K պարունակող մթերքների օգտագործման եւ տարեց մարդկանց մոտ Ալցհեյմերի հիվանդության զարգացման ռիսկի նվազեցման միջեւ: Վիտամին K2-ն, օրինակ, կարող է սինթեզվել մարդու աղիքի բակտերիաների կողմից եւ հայտնաբերվել է նաեւ շատ սննդամթերքներում:
Սննդի, աղիների միկրոբիոմի եւ առողջության միջեւ կապը գնալով ավելի պարզ է դառնում: Աղիքային միկրոբիոմը կարեւոր դեր է խաղում ծերացող օրգանիզմի առողջության մեջ, եւ դիետան կարող է ազդել միկրոբիոմի կազմի վրա: Վիտամին K-ն, այլ սննդանյութերի եւ կենսաակտիվ միացությունների հետ միասին, ուսումնասիրվում է ծերացման համատեքստում եւ դրա կապը աղիքային միկրոբիոմի հետ:
Այնուամենայնիվ, օրգանիզմում վիտամին K-ի պակասությունը չափազանց հազվադեպ է, եւ դեռ պարզ չէ, թե արդյոք անհրաժեշտ է այս վիտամինի լրացուցիչ ընդունումը: Առողջ սնունդը առողջության պահպանման հիմնական գործոնն է եւ կարող է կարեւոր դեր ունենալ ծերացման գործընթացում: