Հոկտեմբերին Հայաստանում հոգեկան առողջության միամսյակ է նշվում

Հոկտեմբերի 10-ին ողջ աշխարհը հոգեկան առողջության համաշխարհային օրն է նշելու, իսկ Հայաստանում ողջ հոկտեմբեր ամիսը հոգեկան առողջության միամսյակ է հայտարարվել: Այս մասին լրագրողներին Հայկական հոգեբուժական ասոցիացիայի նախագահ, համաշխարհային հոգեբուժական ասոցիացիայի ֆինանսական քարտուղար Արմեն Սողոյանն է հայտնել:

Հոգեկան առողջության միամսյակի ընթացքում Հայաստանում մի շարք միջոցառումներ են իրականացվելու: Արմեն Սողոյանը դրանցից մի քանիսն է հիշատակել.

• Գիտաժողով Ստեփանակերտում՝ նվիրված Ղարաբաղում հոգեկան առողջության ծառայությունների հիմնադրման 20-ամյակին;
• Սեմինար՝ ԶԼՄ ներկայացուցիչների համար;
• Հոգեկան եւ վարքային խանգարումներ ունեցող մարդկանց եւ նրանց ընտանիքների» հասարակական կազմակերպության հիմնադրում;
• Հոգեկան առողջության պահպանման եւ բարելավման ռազմավարության եւ գործողությունների պլանի ընթացքի քննարկում;
• Հոգեկան առողջության հայկական հանդեսի 5-ամյակին նվիրված միջոցառումներ;
• Այցելություն մարզային կազմակերպություններ;
• Տարբեր հաղորդումներ, մամլո ասուլիսներ եւ այլն:

«Օրվա խորհուրդն այն է, որ հանրության, կառավարությունների, կազմակերպությունների եւ անհատների ուշադրությունը մեկ անգամ եւս հրավիրենք դեպի հոգեկան առողջության խնդիրները», - նկատել է Արմեն Սողոյանը:

Նա նաեւ նշել է, որ հանրության վերաբերմունքը հոգեկան խնդիրներ ունեցող մարդկանց հանդեպ բավականին բացասական է, ինչն անթույլատրելի է, եւ դրա դեմ քայլեր պետք է ձեռնարկել:

«Ծաղրական վերաբերմունքը հոգեկան խանգարումներ ունեցողների նկատմամբ ընդամենը ցույց է տալիս նման վերաբերմունք ունեցողի ցածր ինտելլեկտը», - նշել է հոգեբույժը:

Միամսյակի գլխավոր նպատակներից մեկը, Արմեն Սողոյանի խոսքով, այն է, որ հասարակության ցանկացած անդամ իմանա, ինչ է հոգեկան խանգարումը եւ ինչպես պետք է վարվել հոգեկան խանգարումներ ունեցող մարդկանց հետ: