Չափել ճնշումը օրը 2 անգամ. սրտաբանի խորհուրդները եղանակի տատանումների հետ կապված
14:06 11 փետրվարի, 2024Եղանակային արտահայտված տատանումներով պայմանավորված ավելացել է զարկերակային բարձր ճնշումով և սրտային այլ հիվանդությունների սրմամբ հիվանդանոցներ դիմողների թիվը: Այս մասին NEWS.am Medicine-ին հայտնեց «Նաիրի» բժշկական կենտրոնի բժիշկ-սրտաբան Տիգրան Խաչատրյանը:
«Սրտային խնդիրները, սովորաբար, գարնանն ու աշնանն են սրվում, սակայն վերջին տարիներին ու հատկապես, այս տարի, սրտային խնդիրներով դիմողների աճ նկատվել է ձմռան ամիսներին»,- ասաց բժիշկը:
Սրտաբանի խոսքով, եթե անցյալ տարի շողացող առիթմիայով և սրտանոթային այլ խնդիրներով հոսպիտալացման դեպքերն էին շատ, ապա այս տարի գերակշռում են զարկերակային բարձր ճնշմամբ և սուր ինֆարկտներով դեպքերը:
Ի՞նչ անել
Տիգրան Խաչատրյանը բարձր ճնշում ունեցողներին խորհուրդ է տալիս.
- սահմանափակել աղի օգտագործումը
- ամեն օր 2 անգամ չափել զարկերակային ճնշումը
- Անհրաժեշտության դեպքում, և միայն բժշկի ցուցումով, փոխել դեղաչափը
Ըստ մասնագետի, ճնշումը պետք է պարբերաբար չափել, քանի որ երբեմն բարձր ճնշման դեպքում բուժառուն իրեն լավ է զգում, և չի հասկանում, որ բարձրացել է ճնշումը:
Տիգրան Խաչատրյանի խոսքով, հաճախ ձմռան ամիսներին դեղաչափի փոփոխության կարիք է լինում, սակայն դա միայն բժշկի հետ խորհրդակցության արդյունքում կարող է որոշվել, բուժառուները չպետք է ինքնաբուժությամբ զբաղվեն:
Տոնական սիրտ
Ձմռանը սրվող տարածված հիվանդություններից մեկը շողացող առիթմիան է: Բժշկի խոսքով հիվանդության սրման գլխավոր պատճառներից մեկը ալկոհոլի չարաշահումն է: Ամանորյա տոներին բուժառուները սովորաբար չարաշահում են ալկոհոլն ու վնասակար սնունդը, մոռանում դեղահաբերի ընդունման մասին, ինչի պատճառով էլ հունվար ամսին ավելանում են հիվանդության սրմամբ պայմանավորված հոսպիտալացման դեպքերը: Բժիշկների շրջանում այս երևույթը որպես «տոնական սիրտ» է հայտնի:
Հիպերտոնիան երիտասարդանում է
Տիգրան Խաչատրյանի խոսքով, ինչպես ամբողջ աշխարհում, այնպես էլ Հայաստանում, հիվանդությունների երիտասարդացման միտում կա: Երիտասարդների շրջանում ավելի հաճախ է զարկերակային ճնշման բարձրացում նկատվում, ինչը, ամենայն հավանականությամբ, վնասակար սովորություններով է պայմանավորված:
Բժիշկը չի բացառում նաև, որ դիմողների թվի աճը հասարակության գիտակցության բարձրացմամբ է պայմանավորված: «Գովելի է, որ արդեն առաջին նախանշանների դեպքում դիմում են, ինչը հնարավորություն է տալիս կանխարգելել հիվանդության հնարավոր բարդացումները»,- ասաց նա: