MedicalXpress. Բուսական սննդակարգը սննդանյութերի պակաս չի առաջացնում
20:19 19 ապրիլի, 2024Մայոյի կլինիկայի (Միացյալ Նահանգների խոշոր բժշկական և հետազոտական կենտրոն) ընտանեկան բժիշկ Քրիստին Նգուենը MedicalXpress-ին հայտնել է, որ մսամթերքից հրաժարվելը չի հանգեցնում սննդանյութերի պակասի և իմունիտետի վատթարացման: Բուսական սննդի մեջ հայտնաբերված բազմաթիվ ֆիտոնուտրիենտները կարող են նույնիսկ բարձրացնել իմունային ֆունկցիան:
Ըստ բժշկի, բուսական սննդակարգի օգուտն ապահովող առանցքային գործոնը տարբեր տեսակի բուսական մթերքների հավասարակշռված օգտագործումն է, այլ ոչ թե կենդանական ծագման մթերքներից խուսափելու փաստը։ Ընկուզեղենը, լոբին և ընդեղենը պետք է կանոնավոր օգտագործվեն՝ օրգանիզմը բջջանյութով ապահովելու համար: Կարևոր է չմոռանալ ֆիտոնուտրիենտներով հարուստ բույսերի մասին։
Ֆիտոնուտրիենտները կենսաբանորեն ակտիվ նյութերի խումբ են, որոնք մրգերին և բանջարեղենին տալիս են յուրահատուկ գույն, համ և հոտ: Դրանց թվին են պատկանում կարոտինոիդները, ֆիտոստերոլները, ֆիտոէստրոգենները, ֆլավոնոիդները և քլորոֆիլները: Այս միացությունները ունեն հակաբորբոքային և հակաօքսիդանտ ազդեցություն (օրգանիզմի բջիջները վնասվածքից պաշտպանելու ունակություն):
Նգուենը նշել է, որ պիգմենտային (վառ գույներով) բանջարեղենը, մրգերն ու հատապտուղները հարուստ են ֆիտոնուտրիենտներով։ Նրանց մյուս կարևոր գործառույթներից են պաթոգեն միկրոօրգանիզմների և քաղցկեղի բջիջների տարածման կանխումը, արյան իմունային բջիջների արտադրության խթանումը և տոքսինները մարմնից արդյունավետորեն հեռացնելու ունակությունը: Սա նշանակում է, որ նույնիսկ մսամթերքից ամբողջովին հրաժարվելու դեպքում, բուսական մթերքներով ճիշտ սնվելու դեպքում, մարդուն սննդանյութերի պակաս և իմունային ֆունկցիայի թուլացում չի սպառնում։