3 քայլ՝ սելեկտիվ աբորտների խնդիրը լուծելու համար

Սելեկտիվ աբորտները Հայաստանում դեռ շարունակում են լուրջ խնդիր մնալ. դրանց պատճառով երկրում արդեն մոտ 50 000 «ավելորդ» տղա կա, որոնք հետագայում մեծ խնդիրներ են ունենալու՝ զուգընկերուհի գտնելու հարցում:

ՄԱԿ-ի Բնակչության հիմնադրամի գործադիր ներկայացուցիչ Գարիկ Հայրապետյանի կարծիքով, սելեկտիվ աբորտների խնդրի լուծմանը բազմակողմանի մոտեցում է անհրաժեշտ:

1. Օրենսդրական փոփոխությունները սելեկտիվ աբորտների դեմ պայքարի ձեւերից մեկն են: Օրենքի միջոցով հասարակությանը հնարավոր կլինի փոխանցել այն գաղափարը, որ սելեկտիվ աբորտները վատ երեւույթ են, կարծում է Գարիկ Հայրապետյանը:

2. Բացի այդ, պետք է նաեւ, որ մարդկանց մտածելակերպը փոխվի եւ երկու սեռերի երեխաների «արժեքը» հասարակության մեջ հավասարվի:

Աղջիկ երեխան ավելի ցածր է գնահատվում, քան տղա երեխան: Շատերը, Գարիկ Հայրապետյանի խոսքով, կարծում են, որ միայն տղան է շարունակում տոհմը եւ միայն նա է կարող ապագայում խնամել ծնողներին, եւ չեն գիտակցում, որ իրականում ծեր ծնողներին խնամողները եւ նրանց ջուր տվողները ոչ թե որդիներն են, այլ նրանց կանայք: Իսկ որպեսզի ապագայում այդ կանայք լինեն, նրանց պետք է թույլ տալ ծնվել:

Պետք է նաեւ այնպես անել, որպեսզի կնոջ դերը հասարակության մեջ ավելի կարեւոր դառնա: Գարիկ Հայրապետյանի խոսքով, այսօր բարձրագույն կրթություն ստացողների կեսից ավելին կանայք են, իսկ լավ եւ գերազանց սովորողների մոտ 70 տոկոսը կանայք են: Բայց չգիտես ինչու գործազուրկների մեծ մասը նույնպես կանայք են՝ չնայած այն բանին, որ լավ կրթություն եւ գիտելիքներ ունեն:

Արդյո՞ք սա նորմալ է, հարցնում է Գարիկ Հայրապետյանը:

Ճիշտ է, աշխարհն այսօր փոխվում է. բայց մարդիկ դեռ պետք է հասկանան, որ կինը նույնքան հնարավորություններ ունի, որքան տղամարդը:

3. Սոցիալական փաթեթները, որոնք որոշակի առավելություններ են առաջարկում 3-րդ կամ 4-րդ աղջիկն ունեցող ընտանիքներին, նույնպես կարող են շահագրգռել մարդկանց չընդհատել հղիությունը, նույնիսկ եթե սպասված տղայի փոխարեն ծնվելու է եւս մեկ աղջիկ:

Հիշեցնենք, որ սելեկտիվ աբորտների պատճառով Հայաստանում շատ ավելի մեծ թվով տղաներ են ծնվում, քան աղջիկներ: Հետաքրքիր է, որ վիճակագրությունը երկրի բոլոր մարզերում տարբեր է. Վայոց Ձորում, օրինակ, աղջիկ-տղա երեխաների հարաբերակցությունը մոտ է նորմային՝ 100 աղջկա դիմաց այստեղ 110 տղա է ծնվում (ըստ նորմայի 100 աղջկա դիմաց 102-106 տղա պետք է ծնվի): Իսկ Գեղարքունիքում եւ Արագածոտնում աշխարհում ամենաբարձր ցուցանիշներն են գրանցվել՝ այստեղ 124 տղա է ծնվում 100 աղջկա դիմաց: