ԱՄՆ-ում երկրորդ բուժքույրն է Էբոլայից ապաքինվել

Լիբերիացի հիվանդից Էբոլա հեմոռագիկ տենդով վարակված ամերիկացի բուժքույր Էմբեր Վինսոնը դուրս է գրվել Ջեորջիա նահանգի Ատլանտա քաղաքում գործող հիվանդանոցից: 

«Այնքան երախտապարտ եմ, որ ապաքինվելու հնարավորություն ունեցա: Աստված ամեն ինչ կարող է անել», - USA Today-ի վկայակոչմամբ, նշել է նա՝ լրագրողների հետ բժիշկների եւ հարազատների ներկայությամբ տեղի ունեցած զրույցի ընթացքում:

Հիշեցնենք, որ Էմբեր Վինսոնը Դալասի հիվանդանոցներից մեկում հեմոռագիկ տենդից մահացած լիբերիացի Թոմաս Դունկանի խնամքն իրականացնելիս էր մահացու վտանգավոր հիվանդությամբ վարակվել: Նրա հետ միասին եւս մեկ բուժքույր՝ Նինա Ֆեմն էր վարակակիր դարձել, ով Մերիլենդ նահանգի հիվանդանոցներից մեկում կազմակերպված բուժումը հաջողությամբ ավարտելուց հետո Սպիտակ տուն՝ ԱՄՆ նախագահ Բարաք Օբամայի հետ հանդիպման էր մեկնել:

ԱՀԿ-ի տվյալներով, հոկտեմբերի 25-ի դրությամբ, ողջ աշխարհում Էբոլա հեմոռագիկ տենդի զոհերի թիվը 4922-ի է հասնում, վարակվածներինը՝ 10141-ի: