Սիերա-Լեոնեի գերեզմանափորները, ի նշան բողոքի, Էբոլայի զոհերի մարմինները փողոցում են թողել
10:29 26 նոյեմբերի, 2014Սիերա-Լեոնեի Կենեմա քաղաքում գործող թաղման բյուրոյի աշխատակիցները Էբոլա հեմոռագիկ տենդից մահացած մի քանի մարդկանց մարմիններ են բնակավայրի գլխավոր հիվանդանոցի մոտ թողել՝ ի նշան ռիսկային աշխատանքի դիմաց հավելավճար չստանալու դեմ բողոքի:
Գործադուլ հայտարարած գերեզմանափորները 15 դիակ են թողել՝ բաց երկնքի տակ: Մարմիններից մեկը հիվանդանոցի կառավարչի կաբինետի դռան, երկուսն էլ՝ հիվանդանոցի դարպասների մոտ են գտնվել: Որոշ ժամանակ անց բոլոր մարմինները դիարան են տեղափոխվել:
BBC-ի հաղորդմամբ, բողոքի ակցիան հեղինակած աշխատակիցները հեռացվել են աշխատանքից: Գերեզմանափորները պնդում էին, թե հոկտեմբեր եւ նոյեմբեր ամիսների համար ռիսկի հավելավճար չեն ստացել:
Երկրի իշխանությունները խոստացել են միջադեպի հետաքննություն իրականացնել՝ նշելով, որ կառավարությունը եւ Համաշխարհային Բանկը գումարներ են հատկացրել՝ ռիսկի հավելավճարի համար: