Զգուշացում. տեսանյութը պարունակում է կադրեր բաց վիրահատությունից
Երեւանի «Քանկոր» սիրտ–անոթային բժշկական կենտրոնի վիրահատարանում հնչում է Շոպենի երաժշտությունը: Երաժշտությունն ընդհատվելուն պես կլինիկայի վիրաբուժական բաժանմունքի ղեկավար Ավետիս Ահարոնյանը բուժքույրերին խնդրում է այն կրկին միացնել:
Բժիշկների համար սա սովորական, ամենօրյա աշխատանք է, իսկ ինձ համար, ով առաջին անգամ է նման գործողության ականատես լինում, զարմանալի տեսարան:
«Տեսա՞ր սիրտը: Հավանաբար այլ կերպ էիր պատկերացնում»,- հարցնում է կլինիկայի ղեկավար Շահեն Խաչատրյանը: Պետք է խոստովանեմ՝ ես շատ բան էի այլ կերպ պատկերացնում:
Բժշկական գրականության համաձայն՝ աորտոկորոնար շունտավորումը իշեմիկ հիվանդության բուժման համար ստանդարտ, բայց ոչ հեշտ վիրահատություն է: Նույնիսկ Վիքիպեդիայում հատուկ նշվում է, որ «աորտոկորոնար շունտավորումը վիրաբույժի եւ նրա թիմի՝ օգնականների, անեսթեզիոլոգի, պերֆուզիոլոգի եւ վիրահատական բուժքույրերի ուշադրության առավելագույն կենտրոնացում է պահանջում»: Այս վիրահատությունը հիմնականում կատարվում է արյան շրջանառության արհեստական սարքի օգնությամբ:
Իսկ հիմա վերը նշված առավելագույն ուշադրության կենտրոնացման մասին ավելի մանրամասն. անհրաժեշտ է վերահսկողության տակ պահել սարքի միջով հոսող արյան եւ սրտի ցուցանիշները, ինչպես նաեւ այն, թե ինչքան խորն է քնած հիվանդը: Անեսթեզիոլոգը վիրահատության ընթացքում ժամանակ առ ժամանակ պերֆուզիոլոգին է հանձնում հիվանդի վիճակը վերահսկող դեղամիջոցներով լի ներարկիչներ, որոնք վերջինս անմիջապես ներարկում է արյան արհեստական շրջանառության սարքով հոսող արյան մեջ:
Վիրաբույժների ձեռքի տակ գտնվում է դեֆիբրիլյատորը. տեսանյութում հնարավոր է տեսնել, թե ինչպես է սիրտը մեկ վայրկյան կանգ առնում, եւ բժիշկներն այն նորից աշխատեցնում են:
Վիրաբույժները նուրբ եւ մանրակրկիտ աշխատանք են կատարում. ոտքից անոթի կտորներ՝ շունտեր են վերցնում եւ տեղադրում խցանվածների փոխարեն՝ մի ծայրը կարելով սրտին, մյուսը՝ զարկերակին կամ երակին:
Այս հիվանդին միանգամից երեք շունտ են տեղադրել:
Բայց ամենազարմանալին այն է, թե ինչ հեշտությամբ է այս ամենն արվում: Կոնկրետ գործողությունների վերաբերյալ մեզ համար մեկընդմեջ արված մասնագիտական բացատրությունները ընդհատվում են կատակներով: Հետո մեզ առաջարկում են հայերեն դժվարարտաբերելի մի բառ ռուսերեն թարգմանել, ու այդ ամենը համեմվում է լրագրողների հասցեին հնչած սուր խայթոցներով: Ընթացքում քննարկում են ներկաների երաժշտական ճաշակը, իսկ այդ ամբողջ ժամանակ վիրաբույժների ձեռքում հնազանդորեն բաբախում է սիրտը, որի արյան նորմալ մատակարարման համար նոր ուղի են բացում:
Վիրահատությունը տեւել է հինգ ժամ, եւ երբ մենք սպառված վերջապես դուրս էինք գալիս վիրահատարանից, պարզվեց, որ բժիշկների խմբին է սպասում եւս մեկ վիրահատություն. կլինիկա էին բերել հրատապ օգնության կարիք ունեցող հիվանդի:
Մինչ երկրորդ հիվանդին վիրահատության էին պատրաստում, Շահեն Խաչատրյանը պատմել է սրտի բուժման մեջ մասնագիտացած «Քանկոր» կլինիկայի առանձնահատկությունների մասին՝ բարձրակարգ մասնագետներ, առաջատար տեխնոլոգիաներ եւ թիմային աշխատանք: «Մենք չունենք հիվանդ, որը բժիշկ ունի, մենք ունենք թիմ, որը հիվանդ ունի»,-նշել է նա:
Թիմի, «որը հիվանդ ունի», կազմում են՝
Ավետիս Ահարոնյան՝ ղեկավար
Արման Քոչարյան՝ սրտի վիրաբույժ
Արմեն Բալայան՝ սրտի վիրաբույժ
Տիգրան Ավագյան՝ անեսթեզիոլոգ
Տիգրան Միրզայի՝ պերֆուզիոլոգ
Վերոնիկա Մանվելյան՝ վիրահատական քույր
[gallery id=44]
Լուսանկարները՝ Արսեն Սարգսյանի
Անահիտ Սարգսյան