Անվճար բուժծառայություններ Երեւանի կանանց համար՝ մարտի 8-ից ապրիլի 7-ը
14:57 3 մարտի, 2015Մարտի 8-ից ապրիլի 7-ը ընկած ժամանակամիջոցում Երեւանում անցկացվելու է «Ձեզ համար, կանայք» ակցիան, որի շրջանակներում մայրաքաղաքի բնակչուհիները հնարավորություն են ստանալու մի շարք անվճար հետազոտություններ անցնելու եւ հարկ եղած դեպքում՝ նաեւ անվճար վիրահատվելու: Այս մասին լրագրողներին մարտի 3–ին ասաց Երեւանի քաղաքապետարանի առողջապահության վարչության պետ Կամսար Բաբինյաննը:
Այս տարվա առողջապահական ակցիայում հետեւյան ուղղություններն են ներառված.
• Աչքի վիրահատություններ
• Ընդհանուր վիրաբուժություն
• Գինեկոլոգիական միջամտություններ
• Համակարգչային տոմոգրաֆիա
• Վահանաձեւ գեղձի հետազոտություններ
Ակցիայից օգտվել ցանկացող կանայք պետք է դիմեն իրենց պոլիկլինիկա՝ տեղամասային թերապեւտին: Առաջնային հետազոտությունները նրանք կանցնեն պոլիկլինիկայում, իսկ հարկ եղած դեպքում կուղեգրվեն այլ հետազոտությունների կամ վիրահատությունների:
Կամսար Բաբինյանի խոսքով՝ քանի որ պացիենտների հոսքն այսպիսի ակցիաների ժամանակ բավական մեծ է լինում, վիրահատությունները հերթագրման սկզբունքով են կատարվելու: Ընդ որում, եթե քաղաքացիները մարտի 8-ից ապրիլի 7-ը ընկած ժամանակամիջոցում դիմեն պոլիկլինիկա, նրանց հերթագրեն, բայց վիրահատության օրը ապրիլի 7-ից հետո նշանակեն, վիրահատությունը նրանց համար միեւնույն է անվճար կլինի:
Նախորդ տարի քաղաքապետարանի ակցիայից 26 000-ից ավելի մարդ է օգտվել եւ 1936 անվճար վիրահատություն է կատարվել, որոնցից մոտ 800-ը աչքի վիրահատություններ էին:
Առաջացող խնդիրների մասին կարելի է ահազանգել քաղաքապետարանի թեժ գիծ. Կամսար Բաբինյանը հավաստիացրեց, որ ցանկացած խնդիր արձագանք կստանա: