Արմավիրում աղիքային ինֆեկցիայով վարակված 11 երեխաներ դեռ գտնվում են հիվանդանոցում
18:04 25 մայիսի, 2015Արմավիրի մարզի թիվ 6 եւ թիվ 9 մանկապարտեզների 11 սաներ դեռ գտնվում են ինֆեկցիոն բաժանմումքում: Այս մասին NEWS.am-Medicine-ի թղթակցին հայտնեցին «Հիվանդությունների վերահսկման եւ կանխարգելման ազգային կենտրոն» ՊՈԱԿ-ից:
Մեզ հայտնեցին, որ երեխաների վիճակը լավ է, առաջիկայում դուրս կգրվեն: ՊՈԱԿ-ից հայտնեցին նաեւ, որ երեխաների թունավորման պատճառը սննդամթերքից երկրորդային աղտոտվածությունն է, այսինքն՝ սնունդը ստացել են, սակայն մշակման ընթացքում այն աղտոտվել է: Այժմ «Հիվանդությունների վերահսկման եւ կանխարգելման ազգային կենտրոնը» մանկապարտեզներում մի շարք կանխարգելիչ միջոցառումներ է իրականացրել, ախտահանում, սակայն թե երբ կբացվեն մանկապարտեզները, հայտնի չէ:
Իսկ ԳՆ սննդամթերքի անվտանգության պետական ծառայությունից NEWS.am-Medicine-ի թղթակցին հայտնեցին, որ Արմավիրի մարզում երեխաների մոտ գրանցված աղիքային ինֆեկցիայի վարակի դեպքերի հետ կապված փորձաքննության արդյունքները կլինեն այս շաբաթ: Դեպքից հետո մանկապարտեզում արվել է առկա սննդամթերքի՝ այդ թվում կաթի նմուշառում եւ հանձնել լաբորատոր փորձաքննության՝ պարզելու համար առողջապահության նախարարության կողմից հաստատված շիգելա զոնե վարակի աղբյուրը: Վարակի աղբյուրը պարզելուց հետո միջոցառումներ կիրականացնեն:
Հիշեցնենք, որ մայիսի 8-ից 10-ը ընկած ժամանակամիջոցում Ալաշկերտի մանկապարտեզ հաճախող վեց երեխաները հոսպիտալացվել են լուծով, փսխումներով եւ բարձր ջերմությամբ, իսկ Առողջապահության նախարարության եւ Հիվանդությունների վերահսկման եւ կանխարգելման ազգային կենտրոնի մասնագետների բակային շրջայցի արդյունքում հայտնեբերվել է եւս հինգ երեխա՝ նմանատիպ աշխտանիշներով, որոնք եւս հոսպիտալացվել են:
Մեկ շաբաթ անց աղիքային ինֆեկցիայի բռնկում էր արձանագրվել Արմավիրի թիվ 6 եւ թիվ 9 մանկապարտեզներում, 16 երեխա հոսպիտալացվել էր։