Գիշերային լույսի առկայծումները կօգնեն ազատվել ջեթլագից
23:25 10 փետրվարի, 2016Ջեթլագի տհաճ հետեւանքները կարելի է հեշտությամբ կանխել՝ արհեստական լույսի օգնությամբ խաբելով մարդու կենսաբանական ժամացույցը՝ վստահեցնում են Սթենֆորդի համալսարանի ամերիկացի գիտնականները:
Շատերը, որոնք ստիպված են հեռավոր ճամփորդություններ կատարել ու կտրուկ փոխել ժամային գոտիները, բախվում են բազմաթիվ տհաճ խնդիրների, երբ օրգանիզմը դժվարանում է հարմարվել օրվա նոր ռեժիմին: Հենց այս երեւույթն էլ կոչվում է ջեթլագ: Ջեթլագը կարելի է կանխել՝ հատուկ լուսային զարթուցիչի օգնությամբ քնի ժամանակ «կոտրելով» օրգանիզմի կենսաբանական ռիթմերը, ասում են ամերիկացի հետազոտողները:
Նրանք ապացուցել են, որ ճանապարհորդները կարող են կանխել ջեթլագը դեռ մինչեւ դրա առաջացումը՝ ստիպելով, որ օրգանիզմը հավատա, որ լուսաբացն ավելի շուտ է սկսվում: Մի խումբ կամավորների լաբորատոր պայմաններում քնի ժամանակ ենթարկել են լույսի առկայծումների ազդեցությանը, որպեսզի ստիպեն, որ նրանք դեռ մինչեւ ճամփորդությունը հարմարվեն մյուս ժամային գոտուն:
Նմանատեսակ «կենսաբանական հաքերությունը» բավականին լավ արդյունք է տվել, ու բոլոր 39 կամավորները՝ 19-ից 36 տարեկան, արագ հարմարվել են ժամային նոր գոտուն՝ դեռ մինչեւ իրենց ճամփորդությունը: Հետազոտությունը ցույց է տվել, որ 10 վայրկյանի պարբերականությամբ ընդամենը երկու միլիվայրկյան տեւող լույսի առկայծումները կարողանում են երկու ժամով առաջ տանել կենսաբանական ռիթմերը՝ այսինքն քնկոտության զգացումը երկու ժամ ուշ է առաջանում:
Այս թերապիան ստեղծում է կեղծ լուսաբացի էֆեկտ, որը լիովին համապատասխանում է այն երկրի ռեժիմին, ուր կամավորները մտադիր են ուղեւորվել: