Ինչպես ճիշտ խնամել ատամները
18:38 11 փետրվարի, 2016Ինչպես է պետք հոգ տանել ատամներին, որպեսզի դրանք առողջ ու ամուր մնան: Այդ մասին մի քանի խորհուրդ է տվել Հայաստանի Առողջապահության նախարարության գլխավոր ատամնաբույժ-վիրաբույժ Կարեն Գրիգորյանը:
Խոզանակ եւ մածուկ
Ցանկալի է ատամները խոզանակով մաքրել օրը երկու անգամ` առավոտյան եւ երեկոյան: Միաժամանակ ցանկալի է նաեւ ատամի մածուկ օգտագործել:
Ատամի թել
Խոզանակը մաքրում է ատամների մակերեւույթի միայն 70-80 տոկոսը, բայց չի կարող հեռացնել ատամների արանքում սննդի մնացորդները: Հենց այդ պատճառով մասնագետները խորհուրդ են տալիս ատամի թելեր օգտագործել, այսպես կոչված ֆլոսսներ:
Բերանի խոռոչի ողողման հեղուկներ
Բերանի ողողման համար հատուկ հեղուկներ օգտագործելը եւս լավ միտք է, կարծում է մասնագետը: Նրա կարծիքով, բերանի հիգիենայի ապահովման համար ցանկալի է օգտագործել խոզանակ եւ մածուկ, ատամի թել եւ բերանի խոռոչի ողողման հեղուկներ:
Որքան հաճախակի է պետք փոխել խոզանակները
Խորհուրդ է տրվում խոզանակները փոխել երեք ամիսը մեկ: Սակայն եթե դուք որեւէ վարակիչ հիվանդությամբ եք հիվանդացել, խոզանակն անհրաժեշտ է փոխել առողջանալուց անմիջապես հետո, նույնիսկ եթե դուք հենց վերջերս եք սկսել օգտագործել այն: Հարցն այն է, որ խոզանակի վրա կարող են հիվանդության հարուցիչներ մնացած լինել եւ այն օգտագործելու դեպքում կրկնակի վարակում տեղի կունենա:
Կանխարգելիչ զննություն
Տարին երկու անգամ ցանկալի է այցելել ատամնաբույժին, նույնիսկ եթե ոչ մի խնդիր չունեք: Միայն բժիշկը կարող է հաստատել, որ ձեր ատամներն առողջ են, եւ միայն նա կարող է բերանի խոռոչի մասնագիտական խնամքի որոշ պրոցեդուրաներ անցկացնել, օրինակ` հեռացնել ատամնաքարը: