Մահացած 9 ամսական երեխայի մոտ հաստատել են լեյշմանիոզ ախտորոշումը
17:52 14 մարտի, 2016Շնող գյուղից 9 ամսական աղջկա մոտ, որը մահացել էր մարտի 9-ին, հաստատվել է լեյշմանիոզ ախտորոշումը: Այդ մասին NEWS.am Medicine-ի թղթակցին հայտնել է Հայաստանի Առողջապահության նախարարության գլխավոր վարակաբան Արա Ասոյանը:
Մասնագետի խոսքով, երեխայի մոտ ախտորոշվել է լեյշմանիոզի վիսցերալ ձեւ:
Հիշեցնենք, որ փետրվարի 17-ին աղջկա ծնողները նրան 37.2 աստիճան ջերմությամբ տարել էին բնակության վայրի ամբուլատորիա, ինչից հետո, երբ ջերմությունը բարձրացել էր մինչեւ 38, նրան տեղափոխել էին Ալավերդի քաղաքի բժշկական կենտրոն: Այնտեղ աղջիկը մնացել էր 8 օր, որից հետո նրան տեղափոխել էին Երեւան:
Լեյշմանիոզը վարակիչ հիվանդություն է, որի հարուցիչը, ինչպես հայտնում է ԱՀԿ-ն, պարզագույն Leishmania մակաբույծն է, որը փոխանցվում է վարակված մոծակների խայթոցից: Մոծակների ավելի քան 90 տեսակ կա, որոնք կարող են փոխանցել այդ հիվանդությունը: Կենդանիների մոտ 70 տեսակ, այդ թվում նաեւ մարդը, Leishmania մակաբույծների բնական պահեստարան են համարվում:
Այս հիվանդության տարածմանը նպաստող վտանգի հիմնական գործոնները, ԱՀԿ-ի մասնագետների խոսքով, սոցիալ-տնտեսական վատ պայմաններն են եւ աղքատությունը, պրոտեինների, երկաթի, А վիտամինի եւ ցինկի բարձր պարունակությամբ սննդամթերքի անբավարար օգտագործումը, ինչպես նաեւ փոփոխությունները շրջակա միջավայրում, ուրբանիզացիան, կլիմայի փոփոխությունները:
Մասնագետների գնահատականով, ամեն տարի աշխարհում լեյշմանիոզով վարակման մոտ 1,3 մլն նոր դեպք է գրանցվում եւ դրա պատճառով մահվան մոտ 20 000 - 30 000 դեպք: