Առաջին հայացքից փողոցում ակտիվ խաղերն անհամեմատ ավելի լավ եւ օգտակար են երեխաների համար, քան համակարգչի դիմաց նստելը: Սակայն ամեն ինչ այդքան պարզ չէ, պնդում է վնասվածքաբան եւ օրթոպեդ Արարատ Նազարյանը:
Մասնագետի խոսքով, ակտիվ խաղերն իհարկե շատ իմաստներով շատ օգտակար են, սակայն դրանք միաժամանակ վնասվածքավտանգ են: Ամռանը, երբ երեխաները շատ ազատ ժամանակ են ունենում եւ փողոցում ավելի շատ ժամանակ են անցկացնում, փողոցում (եւ նույնիսկ մանկական խաղահրապարակներում) խաղերի ընթացքում վնասվածքներ ստացած փոքր հիվանդների թիվն աճում է 2-3 անգամ:
Մասնագետի խոսքով, համակարգչային խաղերն այդ իմաստով ավելի անվտանգ են. ամեն դեպքում, համակարգչի մոտ խաղալով երեխան հանգիստ նստում է եւ ոչ մի վնասվածք չի ստանում: Ճիշտ է, եթե նա համակարգչի մոտ սխալ է նստում, դա կարող է վնասել նրա կեցվածքին, զգուշացնում է մասնագետը:
Ուրեմն ի՞նչն է նախընտրելի` փողոցայի՞ն խաղերը, թե համակարգչային:
Արարատ Նազարյանի կարծիքով, իդեալականն այն է, որ երեխան համատեղի խաղերի երկու տեսակը: Համակարգչի մոտ կարելի է նստել 30 րոպե, ինչից հետո ցանկալի է ավելի ակտիվ խաղերով զբաղվել: Մի քանի ժամ անց նա դարձյալ կարող է վերադառնալ համակարգչի մոտ, սակայն ոչ ավելի, քան 30 րոպեով:
Ցանկալի է, որ ծնողները իմիջիայլոց հետեւեն երեխային` երբ նստած է համակարգչի առաջ (նախ` որպեսզի ճիշտ նստի, եւ երկրորդ` որպեսզի մուտք չունենա այնպիսի բովանդակության, որը չի համապատասխանում նրա տարիքին) եւ երբ խաղում է փողոցում (որպեսզի լուրջ վնասվածքներ չստանա):
Երեխան ինչպես պետք է նստի համակարգչի մոտ, որ չվնասի կեցվածքը:
Ծնողները պետք է հետեւեն, որ երեխան ուղիղ նստի համակարգչի դիմաց: Նրա ծնկների եւ դաստակների անկյունը պետք է 90 աստիճան կազմի, թիկունքը պետք է ուղիղ լինի, որպեսզի նա վիզը չծռի եւ կարողանա նայել ուղիղ իր դիմաց: Կարեւոր է նաեւ հետեւել, որ արեւի լույսն ուղիղ մոնիտորին չընկնի. դա ավելորդ լարվածություն է ստեղծում երեխայի համար:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր